Италия чемпионатининг ушбу мавсуми «Ювентус» учун анча қийин кечмоқда. Сарри шогирдлари ўтказилган 8та ўйиннинг фақат биттасида рақибни 2та тўп фарқи билан мағлуб этди. Қолган барча ўйинлар ё битта тўп фарқи билан ғалаба, ёки дуранг билан якунланди.

«Болонья»га қарши ўйинни туринликлар фаол бошлаб, аста-секин босимни ошириб боришди. Учрашувнинг 20-дақиқасига келиб, бу ўз самарасини берди. Роналдунинг зарбасидан сўнг тўп дарвоза тўрига бориб тушди.

Меҳмонлар эса тезда ҳисобни тенглаштиришди. Данило Ларангейра бурчак зарбасидан сўнг тўпни дарвоза "тўққизлиги"га жойлаб қўйди.

Майдон эгалари танаффусга қадар бошқа хавфли вазият ярата олишмади. Иккинчи бўлимни эса катта иштиёқ билан бошлаб, яна олдинга ўтиб олишди. Гол муаллифи — Миралем Пьянич.

Ўйин охирига қадар "кекса синьора" гол уриш бир қатор имкониятларга эга бўлди. "Болонья" посбонининг сэйвлари эвазига тўп дарвозага кирмади. Ўйин сўнгида эса болоньяликлар ҳисобни тенглаштириш учун 2та имконият эга бўлишди. Бир вазиятда тўп тўсинга теккан бўлса, бир вазиятда Буффон қутқарди.

Шу тариқа, "Ювентус" А серияда мағлубиятсиз серияни давом эттирмоқда ва ўз очколарини 22тага етказиб олди.

Италия чемпионати, 8-тур
Ювентус – Болонья 2:1 (1:1, 1:0)
Голлар: 1:0 – 19 Роналду, 1:1 – 26 Ларангейра, 2:1 – 54 Пьянич.
Ювентус – Буффон, де Лигт, Алекс Сандро, Бонуччи, Рабьо (Матюиди, 73), Куадрадо, Пьянич, Хедира (Бентанкур, 62), Бернардески, Роналду, Игуаин (Дибала, 82).
Болонья – Скорупски, Бани, Ларангейра, Мбайе, Крейчи, Сориано, Сванберг (Ольсен, 80), Орсолини, Поли (Джемаили, 82), Сансоне (Сантандер, 80), Паласио.
Огоҳлантиришлар: Сансоне (22), Рабьо (29), Бентанкур (70), Ларангейра (84), Бани (90).