Эрон расмийлари «Бавария»нинг собиқ ярим ҳимоячиси ва Эрон терма жамоасининг собиқ сардори Али Каримига тегишли экани айтилаётган олтита кўчмас мулк объектини мусодара қилди.
Собиқ футболчи айни дамда хорижда истиқомат қилади ва Эроннинг амалдаги раҳбариятини танқид қилиб келади. Карими ижтимоий тармоқларда норозилик намойишларини қўллаб-қувватлаган, шунингдек, 1979 йилги Ислом инқилоби натижасида ағдарилган монархия тузумини тиклаш тарафдори сифатида фикр билдирган.
Аввалроқ мамлакат ҳукумати миллий хавфсизликка қарши ҳаракат қилаётган шахсларнинг мол-мулки, январь ойидаги намойишлар ҳамда Исроил ва АҚШга қарши ҳарбий ҳаракатлар фонида мусодара қилиниши мумкинлиги ҳақида баёнот берган эди.
Mizan агентлигининг маълумотларига кўра, Каримига тегишли бўлган иккита тижорат ва тўртта турар жой объекти «аниқланган ва суд қарори билан халқ манфаати учун мусодара қилинган».
