Дани Себальос «Реал» кийиниш хонасидаги «айғоқчилардан» бири бўлиши мумкин.
Estadio Deportivo нашри берган маълумотларга кўра, испаниялик ярим ҳимоячи Орельен Тчуамени ва Федерико Вальверде ўртасидаги можаро ҳақида «Реал»дан ташқаридаги шахсларга батафсил сўзлаб берган. Ушбу низо якунда машғулот вақтида футболчиларнинг муштлашиб кетишига сабаб бўлган эди.
Қайд этилишича, мадридликлар бош мураббийи Альваро Арбелоа Себальосни кийиниш хонасидаги ички маълумотларни матбуотга «сизиб чиқиши»да гумон қилмоқда. Футболчи ва мураббий ўртасидаги келишмовчилик Себальос Арбелоанинг у ҳақида салбий фикр билдирганини билиб қолганидан сўнг бошланган. Арбелоа шу ёзда Данини сотиб олмоқчи бўлган клублардан бирининг вакили билан суҳбатда у ҳақида нохуш гапларни айтган. Арбелоа 24 апрель куни «Бетис»га қарши ўйин (1:1) қайдномасига Себальосни киритмаганидан сўнг, улар ўртасидаги муносабатлар бутунлай узилган.
