“Nasaf“-“Andijon“ jamoalari o‘rtasidagi uchrashuvdan so‘ng o‘tkazilgan matbuot anjumanida “Andijon“ jamoasi bosh murabbiyi Aleksandr Xomyakov ishtirok etib, bellashuv haqida o‘z fikrlarini bildirib o‘tdi.
- O‘zingiz guvohi bo‘ldingiz, biz Qarshida yana bir bor mag‘lubiyatga uchradik. O‘zbekiston kubogi 1/8 finalida ham 3:0 hisobida imkoniyatni boy bergan edik. Bugun yana o‘sha ssenariy takrorlandi. Afsuski biz o‘z darvozamiz daxlsizligini saqlay olmadik. 3ta goldan ikkitasini standart vaziyatlardan o‘tkazib yubordik. Kubok bellashuvida ham aynan shunday bo‘lgan edi.
- Bugungi asosiy vazifamiz himoyada tartibli harakat qilib, qarshi hujumlardan to‘g‘ri foydalanish edi. Ammo bugungi rejamiz ish bermadi. Natija adolatli bo‘ldi. “Nasaf” jamoasini g‘alaba bilan tabriklayman.
- Jamoaning oldiga qo‘yilgan asosiy maqsad mavsum so‘ngiga qadar imkon boricha turnir jadvalida yuqorilash. Noxush vaziyatdan chiqib ketishga harakat qilamiz. Chunki keyingi to‘rtda o‘yinni o‘z uyimizda o‘ynaymiz.
