Butun dunyo yaqinlashib kelayotgan Tokio Olimpiadasiga tayyorgarlik ko‘rayotgan bir mahal 2024 yilgi Olimpiya o‘yinlari mezbonlari musobaqaning yangi logotipi bilan barchaning diqqat-e’tiborini o‘ziga tortishdi. Bugun erta tongdan butun dunyo bo‘ylab Parij-2024 Olimpiya va Paralimpiya o‘yinlarining yangi ramzidan chiqqan cho‘q asta-sekin alanga olmoqda. Ha, yangi logotipga aynan shunday ta’rif berish mumkin. Unda bir vaqtning o‘zida Olimp tog‘ida alanga olgan olov va Fransiya Respublikasining milliy ramzlaridan biri bo‘lmish Mariannani uchratish mumkin.
Tashkilotchilar olovga berilgan ta’rifda Parij-2024 ishtirokchilar hamda muxlislar uchun energiya va unutilmas daqiqalarni taqdim etishiga ishora ekanini aytib o‘tishmoqda. Marianna esa fransuzlar nazlida Olimpiya va Paralimpiya o‘yinlari uchun revolyusion ruhiyatni anglatadi.
Ma’lumot uchun, Parij 2024 yilning 26 iyulidan 11 avgustiga qadar Olimpiya o‘yinlarini qabul qilsa, Paralimpiya o‘yinlariga 28 avgust – 8sentyabr kunlari mezbonlik qiladi.
