Professional boksning birinchi o‘ta yengil (-48,99 kg) vazn toifasida ringga chiqishi kutilayotgan Hasanboy Do‘smatov noyabr oyining o‘zida bir yo‘la ikkita jang o‘tkazishi mumkin. Bu haqda GoSport.uz internet-nashri manbalari xabar bermoqda.
Ma’lumotlarga ko‘ra, bokschi 10 noyabr kuni Xitoyyning Fujou shahrida bo‘lib o‘tadigan boks oqshomida o‘zining debyut jangini o‘tkazishi mumkin. Manbalarning qayd etishicha, Hasanboy mazkur boks oqshomida xitoylik De Bin Ju (3-1-1, 2 KO) bilan ringga ko‘tarilishi mumkin. Raqib o‘zgarishi ham ehtimoldan xoli emas.
Eslatib o‘tamiz, oldinroq Hasanboy Do‘smatov 30 noyabr kuni Monakodagi boks oqshomida debyut qilishi xabar qilingandi. Boshqa manbalarga ko‘ra esa u birinchi jangidayoq jahon chempionlik kamariga tushishi mumkinligi aytilgandi.
