Liga kubogi yarim final doirasidagi “Qo‘qon-1912” – “Paxtakor” uchrashuvidan keyingi matbuot anjumanining ikkinchi qismida mezbonlar ustozi Aziz To‘xtaboyev qatnashdi.

"O‘yin haqida gapiradigan bo‘lsak, birinchi bo‘lib to‘p o‘tkazib yuborganimizga qaramay, uchrashuvni yaxshi boshlagan edik. Birinchi bo‘lim oxirida gol o‘tkazib yubordik. Hisob 1:3 bo‘lib turgan paytda to‘p darvoza ustuniga tegdi. Vaziyatlardan foydalana olmadik.

Qolaversa, bugun asosiy tarkibning bir qator futbolchilari maydonga tusha olishmadi. Xolmuhammedov diskvalifikasiya tufayli, Milich jarohati bois, Ahmadov, Sindarov va Hojimat Erkinov “Paxtakor” jamoasidan ijaraga olinganligi sababli bugun ularning xizmatlaridan foydalana olmadik. Shunday bo‘lsa ham maydonga tushgan futbolchilar borlarini berib o‘ynashdi. Bugun chiroyli o‘yin ko‘rsatishgani uchun shogirdlarimga minnatorchilik izhor etmoqchiman. “Paxtakor” hozirgi kunda O‘zbekistonning eng kuchli jamoasi. Buniyam tan olish lozim", — dedi To‘xtaboyev.