Aralash jang san’ati (MMA) bo‘yicha o‘rta (-84 kg) vazn toifasida oktagonga chiqib kelayotgan o‘zbekistonlik Mahmud Muradov (23-6, 14 KO) UFCdagi ikkinchi jangi bo‘yicha shartnoma imzoladi. Bu haqda GoSport.uz internet-nashri manbalari xabar bermoqda.
Ma’lum bo‘lishicha, Mahmud Muradov MMAning eng nufuzli turniri bo‘lgan UFCdagi ikkinchi jangini o‘tkazish bo‘yicha kelishuvga erishgan. Hozircha jang qachon bo‘lib o‘tishi aniq emas. Manbalarga ko‘ra, bu UFC kechasi 2020 yilning boshida bo‘lib o‘tadi. Bo‘lajak raqib haqida ham tez orada ma’lumot beriladi.
Eslatib o‘tamiz, Mahmud Muradov UFCdagi debyut jangini 28 sentyabr kuni o‘tkazgandi. Daniya poytaxti Kopenhagenda UFC Fight Night 160 turniri doirasida u italiyalik Alessio di Kirikoga (12-4, 9 KO) qarshi oktagonga chiqib, uch raund yakunlariga ko‘ra, ochkolar hisobida g‘alaba qozongandi.
Ta’kidlab o‘tish joiz, Mahmud Muradov UFC bilan to‘rtta jangga shartnoma imzolagan. Jangdagi natijalarga qarab bu muddat yana uzaytirilishi mumkin bo‘ladi. U mazkur nufuzli turnirda ishtirok etish huquqini qo‘lga kiritgan ilk o‘zbekistonlik sportchi sifatida tarixda qoldi.
