Superligada yuzaga kelgan tanaffus munosabati bilan jamoamiz futbolchilariga berilgan qisqa muddatli ta’til tugadi va bugundan AGMK mashg‘ulotlarni tikladi.
Qibrayda yig‘ilgan jamoamiz a’zolari bugundan e’tiboran Superliganing oxirgi 3ta turi doirasidagi o‘yinlar va Liga Kubogi finaliga tayyorgarlik jarayonini boshladi.
Mazkur yig‘in doirasida jamoamiz ikkita nazorat uchrashuvini ham o‘tkazishi ko‘zda tutilgan. Dastlabki nazorat bahsini 11 noyabr kuni "So‘g‘diyona"ga qarshi o‘tkazsak, oradan bir hafta o‘tgach, ya’ni 18 noyabrda "Andijon" jamoasi bilan bellashuv o‘tishi rejaga kiritilgan.
Yuzaga kelgan tanaffus vaqtida futbolchilarning o‘yin amaliyoti mazkur o‘tkaziladigan nazorat bahslari orqali saqlab qolishga qaratiladi.
Eslatib o‘tamiz, AGMK joriy mavsum yakunida yana to‘rtta o‘yin o‘tkazadi. Chempionat doirasida avval Qo‘qonga safar qilinsa, keyinchalik Olmaliqda "Qizilqum" bilan uydagi yopilish uchrashuvi bo‘lib o‘tadi. Superligadagi oxirgi turni esa jamoamiz Buxoroda o‘tkazadi. Shuningdek, qish faslida esa Liga Kubogi finali orqali mavsumga yakun yasaladi. Bo‘lajak muhim o‘yinlarga esa AGMK mazkur yig‘in orqali qizg‘in hozirlik ko‘radi.