U-23 Osiyo chempionati final bosqichiga tayyorgarlik olib borayotgan O‘zbekiston olimpiya terma jamoasi BAAda yig‘in boshlaganidan xabaringiz bor.

Olimpiya terma jamoamiz BAA yig‘ini doirasida “Dubay xalqaro futbol musobaqasi”da ishtirok etadi. Joriy yilgi “Dubai Cup” musobaqasida qit’amizning 8 ta – BAA, Saudiya Arabistoni, Bahrayn, Suriya, Janubiy Koreya, Iroq, Iordaniya hamda O‘zbekiston olimpiya terma jamoalari g‘oliblik uchun bahs olib borishadi. Musobaqa 19 noyabr kuniga qadar davom etadi. Har bir terma jamoa 4 tadan o‘yin o‘tkazadi. Yakunda eng ko‘p ochko jamg‘argan terma jamoa musobaqa g‘olibi bo‘ladi.

Qayd etish joiz, O‘zbekiston olimpiya terma jamoasi musobaqaning amaldagi g‘olibi sanaladi. Bu yil uchinchi marta o‘tkazilayotgan mazkur turnirning o‘tgan yilgi mavsumida vakillarimiz bosh sovringa ega chiqishgan edi. Lyubinko Drulovich boshqaruvidagi O‘zbekiston olimpiya terma jamoasi bu galgi turnirda ham g‘olib chiqish maydonga tushadi.

Bugun turnir tashkilotchilari hamda ishtirokchi terma jamoalar rasmiylari ishtirokida musobaqa oldi yig‘ilish bo‘lib o‘tdi. Unda musobaqaning qonun-qoidalari, tashkiliy masalalar, jamoalar o‘yinlarni qanday rangdagi libosda o‘tkazishi kabi masalalar muhokama etildi. Taqvimga ko‘ra, Osiyo chempionati final bosqichida bir guruhdan o‘rin olgan terma jamoalar “Dubai Cup”da o‘zaro to‘qnash kelmaydi. Ta’kidlash joiz, “Dubai Cup-2019”da VAR tizimidan ham foydalaniladi.

O‘zbekiston olimpiya terma jamoasi musobaqa doirasidagi dastlabki uchrashuvini ertaga Iroq olimpiya termasiga qarshi o‘tkazadi.