Xalqaro boks federasiyasi (IBF) professional bokschilarning oktyabr oyi uchun yangilangan reytingini e’lon qildi. Bu haqda GoSport.uz internet-nashri muxbiri xabar bermoqda.
E’lon qilingan yangi reytingda yarim o‘rta (-66,68 kg) vazn toifasida ringga chiqayotgan Qudratillo Abduqahhorov (17-0, 9 KO) o‘z vaznida rasman birinchi raqamli da’vogar nomini saqlab qoldi. Eslatib o‘tamiz, u 30 mart kuni yaponiyalik Keita Obarani (21-4-1, 19 KO) ochkolar hisobiga mag‘lubiyatga uchratgan va buning evaziga mart oyi uchun reytingda peshqadamga aylangandi. Abduqahhorov ayni vaqtda WBC reytingida beshinchi, WBO reytingida esa 11-o‘rinni egallab turibdi.
Super yengil (-63,5 kg) vazn toifasida ringga chiqayotgan boshqa bir o‘zbekistonlik bokschi Shohjahon Ergashev (17-0, 15 KO) mazkur yo‘nalish reytingida sentyabr oyida bo‘lgani 6-o‘rindan joy oldi. Super yengil vazn toifasining yana bir vakili Shahram G‘iyosov (9-0, 7 KO) ham o‘tgan oydagi kabi 15-o‘rinda qayd qilindi. Shohjahon Ergashev ayni vaqtda WBA reytingida oltinchi, WBO reytingida o‘n birinchi, WBC reytingda esa 28 o‘rinda bormoqda. O‘z navbatida Shahram G‘iyosov WBA reytingida yettinchi, WBC reytingida esa 22-o‘ringa joylashib olgan
IBF reytingidan o‘zbekistonlik boshqa bokschilar o‘rin olishmagan.