PFL bosh direktor o‘rinbosari Diyor Imomxo‘jayev o‘z telegram kanalida Superligadan mavsum yakuniga ko‘ra nechta jamoa tushib ketishi haqida fikr bildirdi.
Shu savol ko‘pchilikni adashtiryapti. Yodingizda bo‘lsa, yil avvalida format 12 ta klub uchun moslangandi. Va bunda 2 ta klub quyi ligaga tushib ketishi, yana biri esa o‘tish o‘yinida ishtirok etishi kerak edi.
Biroq qur’a marosimiga bir necha soat qolganida jamoalar soni 14 taga yetdi. Shundan kelib chiqib, ligadan faqatgina 1 ta klub tushib ketadigan bo‘ldi (ya’ni, so‘nggi jamoa). Uning o‘rnini esa “Mash’al” egallashi aniq bo‘lib ulgurgan.
Nima uchun faqatgina 1 ta? Boisi, 12 talik formatda Pro-ligada da’vogarlar soni ko‘proq edi. “Surxon” va “Dinamo”ga chipta nasib qilgach, Superligada real to‘p sura oladigan jamoalar soni Pro-ligada kamayib ketdi. Ayni holatda Superliga talablari uchun “Mash’al” va “Sho‘rtan” klublarigina javob bera olishardi. Qolgan jamoalarda lisenziyalash talablari bilan bog‘liq muammolar bor. O‘z-o‘zidan, da’vogarlar sonidan yo‘llanmalar soni kamroq bo‘lishi kerak, boshqachasiga raqobat qilib bo‘lmasdi.
