O‘zbekiston futbol assosiasiyasi yurtimizda faoliyat olib borayotgan murabbiylar malakasi va mahoratini oshirish bo‘yicha bir qator dastur va loyihalarni amalga oshirib kelmoqda.

25 noyabr kuni “Bunyodkor” akademiyasida OFKning “B” diplomi dasturi bo‘yicha xalqaro murabbiylik kurslari uchinchi moduli start oldi. Mazkur kursda 24 nafar murabbiylar tahsil olishmoqda. Kursni FIFA va OFK yo‘riqchisi Usmon Toshev olib bormoqda.

Shuningdek, “Chig‘atoy” bazasida ham OFKning “B” diplomi dasturi bo‘yicha xalqaro murabbiylik kurslari uchinchi moduli o‘tkazilmoqda. O‘quv jarayoniga FIFA va OFK yo‘riqchisi Islom Ahmedov rahbarlik qilmoqda. Ham nazariy, ham amaliy mashg‘ulotlardan iborat kurs 29 noyabrga qadar davom etadi.

Navoiy shahrida joylashgan “Yoshlik” sport majmuasida esa O‘FA Murabbiylik kurslarining birinchi moduli bo‘lib o‘tmoqda. Mazkur kursga esa Yuriy Arslanov yo‘riqchi etib tayinlangan. Ushbu modul ham 29 noyabrgacha davom etadi. So‘ngra 25-28 dekabr kunlari ikkinchi modul tashkil etilib, murabbiylar imtihonlar topshirishadi.

Bundan tashqari bugundan Toshkentda O‘FA Murabbiylik kurslarining “C” lisenziyasi dasturi bo‘yicha kurslar boshlandi. O‘quv jarayonini yo‘riqchi Dmitriy Kim olib bormoqda. Mazkur kurs 7 dekabrga qadar davom etadi. Qayd etish joiz, kurs yakuniga ko‘ra imtihondan muvaffaqiyatli o‘tadigan murabbiylar O‘FAning 3 yilga mo‘ljallangan “C” lisenziyasiga ega bo‘lishadi.