Germaniya chempionatining 13-turi doirasida kutilmagan natija qayd etildi. «Bavariya» klubi o‘z maydonida «Bayer»ni qabul qilib, imkoniyatni boy berib qo‘ydi.

Bu o‘yinda omad mezbonlardan anchagina yuz o‘girganini ta’kidlash lozim. Masalan, 9-daqiqada Gnabri darvozabon bilan yakkama-yakka vaziyatga chiqib, zarba berdi. Ammo to‘p ustunga tegib qaytdi. Oradan 1 daqiqa o‘tib esa liverkuzenliklar hujumchisi Beyli birga bir vaziyatdan unumli foydalanib, hisobni ochdi.

Uchrashuvning 34-daqiqasida Myuller jarima maydonchasi tashqarisidan zarba bilan muvozanatni tikladi. Biroq oradan yana bir daqiqa o‘tib, yana o‘sha Beyli deyarli yakkama-yakka vaziyatda kuchli zarba orqali Noyerga imkoniyat qoldirmadi.

Ikkinchi bo‘limda ustunlik to‘laligacha myunxenliklar tomonida bo‘ldi. To‘p bir martadan darvoza ustuni va to‘siniga tegdi, ba’zi vaziyatlarda "Bayer" posboni ajoyib harakat qildi.

Natijada, "Bavariya" o‘z maydonida alamli mag‘lubiyatni qabul qildi va jamoa jadvalda 4-o‘ringa tushib qoldi.

Germaniya Bundesligasi, 13-tur
Bavariya – Bayer 1:2 (1:2, 0:0)
Gollar: 0:1 – 10 Beyli, 1:1 – 34 Myuller, 1:2 – 35 Beyli.
Bavariya – Noyer, Pavar, Martines (Alkantara, 81), Alaba, Devis, Goretska, Kimmix, Myuller (Koutinyo, 69), Gnabri, Levandovski, Perishich (Koman, 69).
Bayer – Gradeski, Bender, Ta, Bender, Vendell (Sinkgraven, 65), Arangis (Demirbay, 80), Baumgartlinger, Diabi, Amiri, Beyli (Belarabi, 63), Folland.
Ogohlantirishlar: Baumgartlinger (42), Belarabi (90), Bender (90), Goretska (90).
Chetlatish: Ta (81).