Германия чемпионатининг 13-тури доирасида кутилмаган натижа қайд этилди. «Бавария» клуби ўз майдонида «Байер»ни қабул қилиб, имкониятни бой бериб қўйди.

Бу ўйинда омад мезбонлардан анчагина юз ўгирганини таъкидлаш лозим. Масалан, 9-дақиқада Гнабри дарвозабон билан яккама-якка вазиятга чиқиб, зарба берди. Аммо тўп устунга тегиб қайтди. Орадан 1 дақиқа ўтиб эса ливеркузенликлар ҳужумчиси Бэйли бирга бир вазиятдан унумли фойдаланиб, ҳисобни очди.

Учрашувнинг 34-дақиқасида Мюллер жарима майдончаси ташқарисидан зарба билан мувозанатни тиклади. Бироқ орадан яна бир дақиқа ўтиб, яна ўша Бэйли деярли яккама-якка вазиятда кучли зарба орқали Нойерга имконият қолдирмади.

Иккинчи бўлимда устунлик тўлалигача мюнхенликлар томонида бўлди. Тўп бир мартадан дарвоза устуни ва тўсинига тегди, баъзи вазиятларда "Байер" посбони ажойиб ҳаракат қилди.

Натижада, "Бавария" ўз майдонида аламли мағлубиятни қабул қилди ва жамоа жадвалда 4-ўринга тушиб қолди.

Германия Бундеслигаси, 13-тур
Бавария – Байер 1:2 (1:2, 0:0)
Голлар: 0:1 – 10 Бэйли, 1:1 – 34 Мюллер, 1:2 – 35 Бэйли.
Бавария – Нойер, Павар, Мартинес (Алькантара, 81), Алаба, Дэвис, Горетцка, Киммих, Мюллер (Коутиньо, 69), Гнабри, Левандовски, Перишич (Коман, 69).
Байер – Градецки, Бендер, Та, Бендер, Венделл (Синкгравен, 65), Арангис (Демирбай, 80), Баумгартлингер, Диаби, Амири, Бэйли (Бельараби, 63), Фолланд.
Огоҳлантиришлар: Баумгартлингер (42), Бельараби (90), Бендер (90), Горетцка (90).
Четлатиш: Та (81).