Bugun Xitoyning Tyanszin shahrida og‘ir atletika bo‘yicha Jahon kubogi start oldi. Yilning so‘nggi nufuzli musobaqalaridan birida sayyoramizning eng kuchli polvonlari g‘oliblik uchun bahs olib boradi. Shubhasiz, unda O‘zbekiston terma jamoasi ham g‘oliblik uchun kurashadi. Sizlarni Tokio Olimpiadasiga qimmatli reyting ochkolarini taqdim qiladigan mazkur musobaqa atrofidagi qiziqarli ma’lumot va faktlar bilan tanishtirib o‘tamiz:
Terma jamoamiz ishtirokchilar soni bo‘yicha kuchli uchlikda.
Shubhasiz, O‘zbekiston terma jamoasi vakillari har bir musobaqada yetakchilar qatorida tilga olinadi. Bu musobaqada ham vakillarimiz asosiy tarkib bilan ishtirok etmoqda va g‘oliblik uchun bahs olib boradigan vakillarimiz soni 11 nafarni tashkil qiladi. Bu Xitoy (20) va Janubiy Koreya (16) terma jamoalaridan so‘ng uchinchi ko‘rsatkich demakdir.
Adhamjon Ergashev o‘z vaznini o‘zgartiradi.
Musobaqaning kutilmagan jihatlaridan biri mahoratli sportchimiz Adhamjon Ergashev ushbu musobaqada -73 kilogramm vazn toifasida ishtirok etishi bo‘ldi. Ma’lumki, vakilimiz -67 kg. toifada ishtirok etib kelardi va ushbu vaznda Tokio Olimpiadasi yo‘llanmasini deyarli naqd qilib qo‘ygan. Murabbiylar shtabining mazkur qarori esa ko‘pchilikni taajjublantirdi. Negaki, bu vaznda Olimpiada reytingida yettinchi pog‘onani egallab turgan Doston Yoqubov ishtirok etib kelar edi. Demak, Jahon kubogida Ergashev va Yoqubov yelkma-elka yurtimiz sharafini himoya qilishadi. Ularning asosiy raqibi esa, shubhasiz, musobaqa mezbonlari bo‘ladi.
Jahon kubogida vakillarimiz ishtirok etadigan taqvim:
10 dekabr:
-73 kg: Adhamjon Ergashev va Doston Yoqubov
-81 kg: Muhammadqodir Toshtemirov
11 dekabr:
-55 kg: Muattar Nabiyeva va Nigora Abdullayeva
-89 kg: Sarvarbek Zafarjonov
-64 kg: Kumushxon Fayzullayeva
-71 kg: Nigora Suvonova
12 dekabr:
-81 kg: Tursunoy Jabborova
-109 kg: Akbar Jo‘rayev
+87 kg: Dolera Davronova
Bugun O‘zbekiston Respublikasi Davlat madhiyasi qabul qilingan kun. O‘zbekiston Milliy olimpiya qo‘mitasi ushbu sana munosabati bilan barcha hamyurtlarimizni muborakbod etib, atletlarimiz sharafiga madhiyamizning Xitoy arenasida bir necha bor yangrashini tilab qoladi.
