O‘zbekiston Prezidenti Shavkat Mirziyoyevning Yaponiyaga birinchi rasmiy tashrifi arafasida Tokioda bo‘lib o‘tgan O‘zbekiston-YAponiya Biznes Forumi doirasida o‘tkazilgan muzokaralar natijasida Namangan viloyati hokimligi hamda Yaponiyaning Yamanashi prefekturasi taniqli futbol klubi – “Vanfore Kofu” o‘rtasida hamkorlik aloqasi o‘rnatilib, anglashuv memorandumi imzolandi.

Memorandumni viloyat hokimining o‘rinbosari Okibjon Inamov va “Vanfore Kofu” prezidenti Kazuyuki Umino imzoladilar.

Kelishuvga ko‘ra, Yaponiya J2 League futbol divizioni yetakchi jamoalaridan biri bo‘lgan hamda boy o‘tmishi bilan ajratib turuvchi “Vanfore Kofu” hamda Namangan futboli o‘rtasida doimiy hamkorlik o‘rnatiladi. Yapon klubi yaqin davrda Namanganda o‘z futbol maktabini ochadi, ushbu maktabning eng yaxshi tarbiyalanuvchilari “Vanfore Kofu” tarkibiga qo‘shilish imkoniga ega bo‘lishadi. Shuningdek namanganlik murabbiylar uchun yapon mutaxassislari ishtirokida o‘quv seminarlari, master-klasslar tashkil etadi. “Vanfore Kofu” hamda “Navbahor” jamoalari asosiy tarkiblarining o‘rtoqlik uchrashuvlari ham doimiylik kasb etadi.

Umino, imzolash marosimidan so‘ng O‘zbekistondagi telekanallariga bergan intervyusida ushbu kelishuvning yapon futbol klubi nuqtai nazaridan tarixiy voqelik bo‘lganini qayd etdi.

Suzuki, Citizen, NNS, Pioneer, Daihatsu kabi Yaponiyaning o‘nlab taniqli yirik kompaniyalari homiyligida faoliyat olib borayotgan “Vanfore Kofu” bilan erishilgan bu kelishuv, o‘z-o‘zidan homiy kompaniyalarning Namangan viloyatiga bo‘lgan qiziqishini shakllantirishga hamda kelgusida investisiyalar sohasida hamkorlik uchun zamin yaratadi.