UFCʼning asosiy jangida irlandiyalik Konor Makgregor ishtirok etadigan navbatdagi turniri uchun chiqarilgan chiptalar 24 soatda sotilib ketdi. Bu haqda jurnalist Kevin Ayol tashkilot rahbari Deyn Uaytga asoslanib xabar berdi.

31 yoshli Makgregor va amerikalik Donald Serrone o‘rtasida yarim o‘rta vaznda bo‘lib o‘tadigan bellashuv UFC 246 turnirining asosiy jangiga aylanadi. Musobaqa 2020 yil 19 yanvar kuni bo‘lib o‘tadi.

Ayolning aytishicha, bir kundayoq sotilib ketgan chiptalardan 10 million dollar foyda kelib tushgan.

29 noyabr kuni Makgregorning navbatdagi raqibi Serrone bo‘lishi ma’lim qilingandi. Amerikalik jangchi UFCʼda g‘alabalar soni bo‘yicha rekordchi sanaladi — 23 ta. Irlandiyalik sportchi esa oktagonga qaytishini Moskvada bo‘lib o‘tgan matbuot anjumanida ma’lum qilgandi.

Xabaringiz bor, uning shu paytgacha oxirgi jangi 2018 yil oktyabr oyida bo‘lib o‘tgandi. O‘shanda u rossiyalik jangchi Xabib Nurmagomedovga yutqazib qo‘yib, yengil vaznda UFC chempioni maqomini qaytarib olishning uddasidan chiqa olmagan edi.

Eslatib o‘tamiz, Makgregor ikki vazn toifasida UFCʼning sobiq chempioni hisoblanadi.