Angliya chempionatining ushbu mavsumida barcha narsa "Liverpul"ning chempionligi uchun qarab ketmoqda. Mersisaydliklarning asosiy raqibi — «Manchester Siti» "Boxing Day"ngi mag‘lubiyat bilan boshladi. «Vulverxempton» o‘z uyida "shaharliklar"ni mag‘lubiyatga uchratdi.

Uchrashuvning 12-daqiqasida mezbonlar olis masofadan uzatma berib, hujumchini yakkama-yakka vaziyatga chiqarib yubordi. "Vulverxempton" futbolchisi jarima maydonini tark etgan Edersonning ustidan to‘pni oshirib o‘tdi, ammo darvozabon uni yiqitdi. Hakam esa posbonga darhol qizil kartochka ko‘rsatdi. Serxio Ageuroning o‘rniga ikkinchi darvozabon Klaudio Bravo tushirildi.

Bahsning 21-daqiqasida Rahim Sterling raqib jarima maydoni ichida yiqitildi. Hakam dastlab qoidabuzarlik yo‘qligiga ishora qilgan edi. Ammo VAR bilan uzoq maslahatlashuvdan keyin penalti belgiladi. Rahimning zarbasini Ruy Patrisiu qaytardi, qaytgan to‘pni Sterlingning o‘zi darvozaga joyladi.

Ikkinchi bo‘lim boshida Rahim darvozabon bilan yuzma-yuz vaziyatga chiqib ketib, to‘pni posbonning ustidan oshirgancha darvozani ishg‘ol qildi.

Oradan 5 daqiqa o‘tib mezbonlar maydon markazida Sterlingdan to‘pni olib qo‘yishdi va Adama Traore olis masofadan zarba berib, hisobni qisqartirdi.

O‘yin tugashiga 10 daqiqa qolganida «Vulverxempton» raqib darvozasini 2 marta ishg‘ol qilib, g‘alabani ilib ketdi. Dastlab Mendi o‘z jarima maydoni ichida to‘pni hujumchiga oldirib qo‘ydi va darvoza maydoniga yetkazilgan uzatmani Ximenes to‘rga joyladi. So‘ngra mezbonlar himoyachisi Doerti jamoadoshi bilan devor o‘ynab, jarima maydoniga yaqinlashdi va Messi uslubida zarba yo‘llab, jamoasiga g‘alaba keltirdi.

Mazkur g‘alabadan so‘ng «Vulverxempton» 30 ochko bilan 5-o‘ringa ko‘tarilib oldi. "Bo‘rilar" birinchi davra o‘yinida ham "Siti"ni mag‘lub etgan edi.

«Manchester Siti» esa 38 ochko bilan 3-o‘rinda qoldi. Gvardiola jamoasi peshqadam «Liverpul»dan 14 ochko ortda qolmoqda. Klopp jamoasi hisobida bitta zaxira o‘yini bor.

Angliya premyer-ligasi, 19-tur
Vulverxempton – Manchester Siti 3:2 (0:1, 3:1)
Gollar: 0:1 – 25 Sterling, 0:2 – 50 Sterling, 1:2 – 55 Traore, 2:2 – 82 Ximenes, 3:2 – 89 Doerti.
Vulverxempton – Ruy Patrisiu, Dendonker, Koudi, Saiss, Doerti, Ruben Nevesh, Moutinyu, Kastro (Ruben Vinagre, 73), Traore, Ximenes (Bennett, 90), Diogu Jota (Netu, 79).
Manchester Siti – Ederson, Uoker, Otamendi, Fernandinyo, Mendi, Rodri Ernandes, Bernardu Silva, Marez (Erik Garsiya, 46), de Bryuyne (Gyundogan, 67), Sterling, Aguero (Bravo, 14).
Ogohlantirish: Otamendi (60).
Chetlatish: Ederson (12).