Xokkey bo‘yicha yoshlar o‘rtasidagi jahon chempionati finalida Rossiya Kanadaga qarshi bellashdi. Ushbu o‘yin translyasiyasi esa, «Perviy kanal» tomonidan jonli efirda uzatildi. Uchrashuv 4:3 hisobida kanadaliklar foydasiga hal bo‘ldi.

Gap shundaki, ko‘pchilik o‘yinni Rossiyaning asosiy sport kanali bo‘lmish "Match TV"dan kutgan. "Match" esa, ayni shu paytda 2011 yildagi finalni namoyish etgan. O‘shanda Rossiya Kanada bilan to‘qnashib, 5:3 hisobida g‘alaba qozongandi.

Xullas, o‘yinni bee’tibor kuzatgan yoki xokkey mavzusidan uzoqroq bo‘lgan juda ko‘pchilik "Match TV"dagi translyasiyani jonli deb o‘ylashgan va bir-birini tabriklay ketishgan. Ayniqsa, ijtimoiy tarmoqlarda Rossiyani chempionlik bilan tabriklashlar ko‘p kuzatildi, ularning orasida mashhur insonlar bor.

Masalan, GosDumaning jismoniy tarbiya, sport va turizm masalalari bo‘yicha raisi, deputat Mixail Degtarev feysbukda xokkeychilarni tabriklab yuborgan (shu o‘rinda, bir paytlar vazirlikda ishlaydigan kattagina lavozimdagi shaxsning hamkasbimdan  «Bunyodkor jahon chempionatiga chiqarmikin?» deb so‘ragani yodga tushdi).

Eng kulgili holatni 2011 yildagi o‘sha zafarli turnir chempioni, xokkeychi Vladimir Tarasenkoning rafiqasi aytib berdi:

«Erim bolalarni o‘ynatib, "Match TV"dan finalni ko‘rib o‘tirgandi. Ovoz pasaytirilgandi. U qariyb 10 daqiqa bilmasdan, o‘sha o‘yinni tomosha qildi, to  ekranda o‘zini ko‘rib qolguncha...»

Qahramon Aslanov.