Хоккей бўйича ёшлар ўртасидаги жаҳон чемпионати финалида Россия Канадага қарши беллашди. Ушбу ўйин трансляцияси эса, «Первий канал» томонидан жонли эфирда узатилди. Учрашув 4:3 ҳисобида канадаликлар фойдасига ҳал бўлди.

Гап шундаки, кўпчилик ўйинни Россиянинг асосий спорт канали бўлмиш "Матч ТВ"дан кутган. "Матч" эса, айни шу пайтда 2011 йилдаги финални намойиш этган. Ўшанда Россия Канада билан тўқнашиб, 5:3 ҳисобида ғалаба қозонганди.

Хуллас, ўйинни беэътибор кузатган ёки хоккей мавзусидан узоқроқ бўлган жуда кўпчилик "Матч ТВ"даги трансляцияни жонли деб ўйлашган ва бир-бирини табриклай кетишган. Айниқса, ижтимоий тармоқларда Россияни чемпионлик билан табриклашлар кўп кузатилди, уларнинг орасида машҳур инсонлар бор.

Масалан, ГосДуманинг жисмоний тарбия, спорт ва туризм масалалари бўйича раиси, депутат Михаил Дегтарев фейсбукда хоккейчиларни табриклаб юборган (шу ўринда, бир пайтлар вазирликда ишлайдиган каттагина лавозимдаги шахснинг ҳамкасбимдан  «Бунёдкор жаҳон чемпионатига чиқармикин?» деб сўрагани ёдга тушди).

Энг кулгили ҳолатни 2011 йилдаги ўша зафарли турнир чемпиони, хоккейчи Владимир Тарасенконинг рафиқаси айтиб берди:

«Эрим болаларни ўйнатиб, "Матч ТВ"дан финални кўриб ўтирганди. Овоз пасайтирилганди. У қарийб 10 дақиқа билмасдан, ўша ўйинни томоша қилди, то  экранда ўзини кўриб қолгунча...»

Қаҳрамон Асланов.