Ma’lumki, futbol bo‘yicha O‘zbekiston Olimpiya terma jamoasi Tailandda o‘tayotgan Osiyo chempionati chorak final bahsida bugun o‘z uchrashuvini o‘tkazadi. BAAga qarshi bahsga tayyorgarlik yuqori notada o‘tdi.

Vakillarimiz kecha kunning birinchi birinchi yarmida nonushtadan so‘ng kunduzgi sayr va yengil mashqlarni olib borishdi. Jamoamiz murabbiyi Lyubinko Drulovich esa tushda raqib murabbiyi bilan o‘yinoldi matbuot-anjumanida ishtirok etdi.

Kunning ikkinchi yarmida futbolchilarimiz bo‘lajak bahsdan avval so‘nggi mashg‘ulotga yo‘l olishdi. Murabbiylar shtabi ushbu mashg‘ulot orqali futbolchilarning tayyorgarligini har tomonlama tekshirib oldi. Mashg‘ulot yakuniga yetgach qisqa tiklanish muolajasi ham qabul qilindi.

Jamoa menejeri Aziz Do‘stmuhammedov bu vaqt oralig‘ida jamoamizning ertangi o‘yinga futbolchilarimizning barcha kiyimlarini tayyorlash bilan ovora. Darvoqe, terma jamoamiz bugun 18:15 da start oladigan bahsda ko‘k libosda harakat qiladi.

Yigitlarimiz mashg‘ulotda ancha ter to‘kkani aniq. Yo‘qotilgan energiyaning o‘rnini esa o‘zbekona taomlar qoplab beradi. Jamoamiz shu tariqa kechki ovqat bilan birga kechagi kunni ham yuqori kayfiyatda yakunladi.