Myunxenning «Bavariya» klubi hujumchisi Robert Levandovskiy Bundesliganing 20-turida “Mayns” klubi darvozasini ishg‘ol etib, Bundesliganing 53 yillik rekordini yangiladi.

31 yoshli futbolchi joriy mavsumdagi 22-golini kiritishga muvaffaq bo‘ldi.

Shu tariqa, polshalik hujumchi 1967 yili Gerd Myuller tomonidan o‘rnatilgan rekordni yangiladi. O‘sha yili Myuller 20 ta uchrashuvda 22 ta gol kiritishga muvaffaq bo‘lgandi va natijani 1972/73 yilgi mavsumda ham takrorlagandi deya xabar bermoqda «Bavariya» matbuot xizmati.

Bundan tashqari, Levandovskiy “Bavariya” tarkibidagi 150-golini ham qo‘lga kiritdi. Bundesligada bunday natijani faqatgina sakkiz nafar futbolchi qayd eta olgan.