Mikel Arteta murabbiy sifatida kimdan saboq olib ko‘zi pishganini barchamiz yaxshi bilamiz. Pepning yonida o‘tgan yillar Artetadagi murabbiy shaxsi uchun tajriba, omad, muvaffaqiyat va yana boshqa ko‘plab ijobiyat ekani aniq. Ammo, ispaniyalik mutaxassis hech qachon Artetaning hozirgi vaziyati kabi holatda bo‘lmagan. Shuning uchun undan ustozining uslubi yoki yo‘lini kutish noto‘g‘ri bo‘ladi. Fikrimni izohlashga harakat qilaman.

Gvardiola zamonaviy futbolga o‘z imzosi bilan kirgan, tarix uchun kichik,  biroq futbol uchun yetarli darajada katta bir davr mobaynida hukmron uslubi va o‘yini bo‘lgan "Barselona"ni shakllantirdi. (Kimdir, bu o‘yin Gvardiolagacha ham bo‘lgan, desa, men "ha,  shunday",  - deyman. Bahslashmayman!).

Katalon klubi cho‘qqida ekan o‘sha davrda uning o‘yiniga eng o‘xshash, eng yaqin o‘yin fikrimcha "Arsenal"da edi. Illo, Venger faoliyatining katta bir qismi faqatgina uning jamoasigagina xos bo‘lgan jarohatlar bilan o‘tdi. Bu yerda ligalar o‘rtasidagi farqli holatlar ham o‘ta muhim rol o‘ynagan. Ispan futbolidagi ruhiyat tiki-taka uchun o‘ta ideal. Ammo, APLda vaziyat boshqacha. Ruhiyat o‘zga, tezlik va kurash ritmi baland. Bu yerda sanoqsiz mayda uzatmalar ustiga o‘yinni qurish uchun tarkib egiluvchanligi juda yuqori bo‘lishi darkor. Ya’ni, keng va muhtasham (ikki) tarkib zarur. Arsenga "Arsenal"da shuning yo‘qligi pand berdi. Gvardiolaning o‘zi MSda buni aynan o‘sha muhtasham imkoniyatlar va bitmas-tuganmas resusrlar orqali uddaladi.

Muammo shundaki, “Arsenal” rahbariyati hali ham katta maqsadlarni amalga oshirishga qodir tarkib shakllantirish fikri, xohishi va irodasidan yiroq. Arteta iloji boricha ustozining emas, o‘zining xos uslubi va yo‘lini topgani ma’qul. Biroq, bu albatta tiki-takaga zid bo‘lishi yoki undan olisda bo‘lishi shart ham emas. Ya’ni, yangilik ixtiro qilish emas, borini mukammalashtirish, o‘z futbolchilari imkoniyatlaridan kelib chiqib shakl berish lozim.

O‘zi nega Arteta haqida yozdim. Yana sanoqli daqiqalardan so‘ng Futbol TV telekanilida uning jamoasi ishtirokidagi o‘yin translyasiyasi boshlanadi. O‘yindan o‘yinga uning murabbiy sifatidagi arsenalida qanday qurollar borligi haqida tasavvur hosil bo‘lmoqda. Hali yakuniy fikrlarga ertaligi rost. Lekin, aynan mana shu Artetaning arsenalidagi qurollar “Arsenal”ning istoqbolini belgilaydi.

Ko‘ramiz, bugun nima bo‘lar ekan?!

Futbol TV, Coat 19:00
“Byornli” – “Arsenal”