O‘z o‘quv-mashg‘ulot yig‘inini Turkiyada olib borayotgan Namanganning “Navbahor” jamoasi mazkur yig‘in doirasidagi so‘nggi - sakkizinchi nazorat-sinov bahsini bugun Norvegiyaning “Eydsvold” (Tern) jamoasiga qarshi o‘tkazdi.

Belek shahridagi “Suena” stadionida bo‘lib o‘tgan mazkur o‘yinda durang – 1:1 hisobi qayd etildi.

Mazkur o‘yinning 15-daqiqasida norvegiyaliklar  jamoamiz darvozasiga to‘p kiritib, 1:0 hisobida oldinga chiqib olishdi. Oradan 5 daqiqa o‘tar-o‘tmas, namanganliklar 11 metrli jarima zarbasi tepish huquqini qo‘lga kiritishdi. Penaltini esa Amirbek Jo‘raboyev aniq amalga oshirib, muvozanatni tikladi – 1:1.

Natijada tanaffusga har ikki jamoa a’zolari 1:1 hisobidagi durang natija bilan chiqib ketishdi.

Bahsning ikkinchi bo‘limida garchi har ikki jamoada bir qator vaziyatlar yuzaga kelgan bo‘lsa-da, futbolchilar undan samarali tarzda foydalana olishmadi. Natijada 1:1 hisobi o‘zgarishsiz qoldi.

Mazkur bahsda "Navbahor" ustozi Andrey Kanchelskis maydonga quyidagi futbolchilarni tushirdi:

Dilshod Hamroyev, Mirkomil Lokayev, Obid Jo‘raboyev, G‘iyosjon Komilov, Shahzodbek Hamidov, Amirbek Jo‘raboyev, Sardor Telyakov, Abdulhay Ismoilov, Husayn Ergashboyev, Zabihillo O‘rinboyev, Anvar Hojimirzayev.
Zaxiradan maydonga tushganlar: Islom Abdullaxonov, Komil Tojiddinov, Xurshid Muxtorov.   


Eslatib o‘tamiz, Turkiyadagi yig‘in davomida namanganliklar 8ta o‘rtoqlik uchrashuvi o‘tkazishdi.

Mazkur nazorat - sinov bahslarida “lochinlar” Turkmanistonning “Axal” klubini 1:0, Serbiyaning “Rad” jamoasini 2:1, Armanistonning “Uest” klubini 2:0 hisoblarida mag‘lubiyatga uchratib, Ukrainaning “Kolos” jamoasi bilan 0:0, Qozog‘istonning “Jetisu”, Gruziyaning “Samtredia” va  Norvegiyaning “Eydsvold” klublari bilan bo‘lgan o‘yinlarda 1:1 hisoblaridagi durangga imzo chekishdi.

Jamoamiz bo‘lib o‘tgan 8ta bahsning faqatgina bittasida - Gruziyaning “Dinamo” (Batumi) klubiga 0:1 hisobida imkoniyatni boy berdi.

O‘z navbatida batumiliklar bilan bo‘lgan bahsda “Navbahor”ning bir qator yetakchi futbolchilariga dam berilgani, gruziyaliklar g‘alaba to‘pini penaltidan kiritganliklarini ham qayd etish joiz.

Shu tariqa, Andrey Kanchelskis shogirdlari Turkiyadagi o‘quv-mashg‘ulot yig‘inini bugun yakunlashdi.

“Navbahor” PFK matbuot xizmati.