Bugun tunda La Liga 26-turi doirasidan o‘rin olgan markaziy o‘yin guvohiga aylanamiz. “Santyago Bernabeu”da “qirollik klubi” “Barselona”ni qabul qiladi.
Turnir jadvalidagi holat
Joriy mavsumda La Liga g‘olibligi uchun aynan “Real” hamda “Barselona” kurash olib boryapti. “El-klasiko”ga ular ikki ochkolik farq bilan yetib kelishdi. “Real” 53 ochko bilan turnir jadvalida ikkinchi o‘rinda bormoqda. Zidan shogirdlari bugunga qadar La Ligada 15 ta g‘alaba, 8 ta durang va 2 ta mag‘lubiyat qayd etishgan.
“Barselona” esa turnir jadvalida peshqadam, klub bugunga qadar 55 ochko jamg‘argan. Kike Setyen shogirdlari hozirgacha La Ligada 17 ta g‘alaba, 4 ta durang qayd etishgan hamda 4 marta mag‘lubiyatga uchrashgan.
Yo‘qotishlar
Bugungi “klasiko”ni “Real”ning uch nafar muhim futbolchisi o‘tkazib yuboradi: Eden Azar (tizzasidan jarohat olgan), Marko Asensio (tizzasidan jarohat) va Rodrigo (o‘tgan o‘yinda qizil kartochka olgan).
“Barselona” ham bugun maydonga tusha olmaydigan futbolchilar yetarlicha. Usmon Dembele, Serxi Roberto, Luis Suares va Jordi Alba (hammasi jarohat). Shuningdek, “Napoli”ga qarshi YECHL o‘yinida jarohatlangan Pikening ham bugun o‘ynashi so‘roq ostida. Ammo Setyen uni har ehtimolga qarshi qaydnomaga kiritgan.
Qiziqarli faktlar
—“Real” futbolchilarining umumiy narxi (1,08 mlr) “Barselona” futbolchilarining umumiy narxidan qimmatroq (1,07 mlr).
— O‘zaro o‘yinlarda g‘alaba qozonish bo‘yicha ustunlik “Real” tomonida (83-79).
—“Real”ning “el-klasiko”da urgan gollari “Barselona”nikidan 12 taga ko‘p (331 — 319).
Taxminiy tarkiblar
“Real”: Kurtua – Karvaxal, Varan, Ramos, Mendi – Kroos, Kazemiro, Valverde – Modrich, Isko – Benzema
“Barselona”: Ter Shtegen - Semedu, Umtiti, Lengle, Xunior - Rakitich, Buskets, Vidal, Artur - Messi, Grizmann
Nizomjon ISLOMOV tayyorladi.
