O‘zbekistonning eng mashhur futbolchilaridan biri Odil Ahmedov haqida hikoya qilinuvchi asarni e’tiboringizga havola qilamiz.
Ustaning bashorati
Bolaligim oddiy o‘tgan. Oddiy qishloqda oddiy oilada tug‘ilganman. Oilamizda faqat otam ishlardilar, onam uy bekasi. Bolaligida o‘zbek bolasi nima ish qilsa, shuni qilganmiz: uzzukun yalangoyoq ko‘cha changitib yurardik, yozning jaziramasida oshnalarim bilan kattaariqqa cho‘milgani borardik. Kimdir dumalatib kelgan traktorning katta ballonida besh-oltita bo‘lib suzardik. Ballonda suzish ba’zi-ba’zida kurashga aylanib ketardi. Joy talashganlar bir-birini tortqilaganicha suvga qular, yana ballonga chiqish ilinjida qolganlarni ham o‘ziga qo‘shib suvga g‘arq qilardir. Chala-chulpa qurigan kiyimlarimizni kiyib, oshna-og‘ayni, qarindosh-urug‘larning uylariga borardik. Shu taxlit kunni qoraytirardik.
Futbol juda ommalashgan vaqtlar. Qishloqda futbolni sevmagan, unga mehr qo‘ymagan inson yo‘q. Qiziqqanlar futbol o‘ynaydi, o‘ynay olmaydiganlar muxlislik qiladi. Menda futbolga mehr besh-olti yoshlarda uyg‘ongan bo‘lsa kerak. Esimni taniganimdan beri to‘pga oshnoman! Mahallamiz adog‘idagi, qachonlardir chim yotqizilgan-u, ammo taqir joyga aylangan o‘yingohda futboldagi ilk qadamlarimni qo‘yganman. Bolalarga qo‘shilib, futbol o‘ynashni boshlaganimni juda yaxshi eslayman. O‘sha o‘yingoh menga juda ham qadrli. Milliy terma jamoa, “Paxtakor”, “Anji” va “Krasnodar” jamoalari tarkibida ko‘plab o‘yingohlarni ko‘rdim: “Paxtakor”, “Bunyodkor”, “Lujniki”, uchinchi Peschanoy ko‘chasidagi o‘yingoh , “Qozon-Arena” , “Anji-Arena” , “AWD-Arena” , “Jassim bin Hamad...” Bu ro‘yxatni uzoq davom ettirishim mumkin. Lekin mahallamiz adog‘idagi o‘sha g‘arib va taqir o‘yingoh menga bu muhtasham o‘yingohlardanda qimmatli, men doim qumsaydigan joy.
O‘sha vaqtda oilamiz kamharj, faqat otam ishlaydilar. Tabiiyki, asosiy daromadimiz dadamlarning oyliklari. Ba’zida o‘zimiz ham pul topishga harakat qilardik. Hovlidagi mevalarni tog‘oraga solib, Namanganning “Chorsu” bozorida sotib kelganimiz hali ham esimda.
Namanganda futbol azaldan eng sevimli sport turi. Juda yaxshi eslayman – qishlog‘imizdan Namangan va Toshkentdagi futbol maktablarida o‘qiydiganlar juda ko‘p edi. Hamma ularga havas qilardi.
Dadamning o‘zlari ham ashaddiy futbol muxlisi, yoshliklarida futbol musobaqalarida ishtirok etganlar. Hatto yigitlik vaqtlarida ham so‘roqsiz futbolga ketib qolaverganlaridan opoqdadamdan so‘kish ham eshitgan ekanlar.
(davomi bor)
Baxtiyor ABDUG‘AFUR.
