Iordaniyada boks bo‘yicha Osiyo/Okeaniya mintaqalari uchun Tokio-2020 yo‘lidagi lisenzion turnir davom etadi. Biroz avval eng og‘ir vazn toifasida hamyurtimiz Bahodir Jalolov (+91 kg) chorak final bosqichi doirasida o‘zining musobaqadagi ilk jangini o‘tkazdi.
Ushbu bahs g‘olibga yarim final qatori Tokio-2020 yo‘llanmasini ham taqdim qilishi bilan yanada ahamiyatli edi. Bahraynlik Danis Latipovga qarshi ringga ko‘tarilgan Jalolov jangda to‘liq ustunligini namoyish qildi va ishonchli g‘alabani o‘z hisobiga yozib qo‘ydi — 5:0 (30:27, 29:28, 29:28, 29:28, 30:27).
Shu tariqa, delegatsiyamizning Tokio-2020 Olimpiya o‘yinlari uchun qo‘lga kiritgan umumiy yo‘llanmalari o‘n yettitaga yetdi. Bahodir Jalolov esa Rio-2016dan so‘ng yana bir Olimpiya o‘yinlari lisenziyasiga ega chiqdi.