— O‘zbekiston futboli haqidagi ilk taassurotlaringiz qanday?
— Bu yerda barchasi butkul o‘zgacha. Futbol professional darajada rivojlangan. Maydonlar, futbol mutasaddilari, muxlislar —  hammasi o‘ziga jalb etadi.

— Bilamiz, siz jamoaga Turkiyadagi o‘quv— mashg‘ulot yig‘ini davomida qo‘shildingiz, xorijdagi tayyorgarlik qanday kechdi?
— Turkiyada shaxsan men uchun juda qiyin bo‘ldi, xaqiqiy sinov kunlari edi. Men doim asabiy yurar edim, chunki klubga o‘zimni nimalarga qodirligimni isbotlashim lozim edi. Baxtimga boshqa futbolchilar meni qo‘llashdi va men jamoaga tez kirishib ketdim.

— Afrika qit’asidan kelib Osiyoda o‘ynash siz uchun noqulaylik tug‘dirmayapti?
— Futbol sharoit tanlamaydi. Men bilan hammasi joyida. Bu yer o‘z vatanimni eslatib yuboryapti, doim quyosh kulib boqadi.

— "Qizilqum" jamoasiga o‘tishingizdan oldin, mazkur klub haqida nimalarni bilar edingiz?
— To‘g‘risini aytsam, men O‘zbek futboli haqida hech narsani bilmas edim. Agentim bilan gaplashganimdan so‘ng, u menga futboli rivojlanib borayotgan O‘zbekiston klubidan taklif bor dedi. Keyin esa men ushbu jamoaning o‘yinlarini sinchkovlik bilan kuzatdim va rozi bo‘ldim.

— Yangi klubingiz haqida nimalar deya olasiz. Klub tashkiliy ishlari, maydoni, muxlislari sizda qanday his uyg‘ota bildi?
— Jamoa men kutganimdan ham a’lo ekan. Tashkiliy ishlar birinchi o‘rinda, professional murabbiylar, malakali shifokorlar, 90 daqiqa tinim bilmaydigan muxlislar —  bularning barchasi tunlari tushimni ham tark etmaydi.

— O‘tgan turlar davomida siz O‘zbekistonning bazi jamoalari potensialiga guvoh bo‘ldingiz. Nima deb o‘ylaysiz, mavsum mobaynida raqib himoyasidan o‘tish uchun nimalarga ko‘proq e’tibor berish lozim?
— Biz Afrikaliklar kuchimiz va tezligimizga tayangan holda harakat qilamiz. Murabbiyimiz barcha uchrashuvlarda raqibga qarab taktika qo‘llaydi, lekin ko‘pincha jamoa mening tezligimga ishonib yo‘l tutadi. Bu mening yutug‘im hisoblanadi.

— Sizni O‘zbekistonga yo‘l olishingizni eshitgan oila a’zolaringiz birinchi bo‘lib nimalar dedilar?
— Ochig‘i, ular juda ham xursand bo‘lishdi, chunki ular mening kelajagim yaxshi davlatda qurilishi tarafdori edilar.

— Hali top klub bo‘lishga ulgurmagan jamoada to‘p surish siz uchun qanday?
— Men bu yerda chinakamiga baxtliman. Kim aytdi sizlarga bu klub top emas deb? Biz hali shu darajaga erishamiz, faqat buning uchun ozgina vaqt hamda mehnat talab qilinadi.

— Kumiringiz kim? Nega?
— Kumirim —  Ronaldu. Chunki u juda ham ko‘p mehnat qiladi. Men uchun u eng zo‘r o‘yinchi.

— Agar sizda tanlash imkoni bo‘lganida, Ronaldu bilan bitta jamoada to‘p tepishni va doim ikkinchi planda bo‘lishni maqul ko‘rarmidingiz yoki biror boshqa klubning xaqiqiy yetakchisi bo‘lishni?
— Boshqa klub yetakchisi bo‘lib, ko‘plab shaxsiy sovrinlar yutishni tanlardim. Keyin esa Ronalduning o‘zi menga muxlislik qilgan bo‘lardi.

— O‘zbekistonda irqchilik haqida nima deysiz?
— Hozircha men buni umuman sezmadim, barcha birdek mehribon. O‘zbek xalqi juda samimiy va mehmondo‘st ekan. Menga yoqdi.

— Kelajakdagi reja va maqsadlaringiz?
— Hozircha orzu va maqsadim bitta —  "Qizilqum" bilan iloji boricha yaxshi natija qayd etish va muxlislarimizni xushnud etish.

— Mkkartney, ajoyib suhbat uchun rahmat. Faoliyatingiz yanada porloq kechishini tilab qolaman.