Dunyo ahlini titratgan oyning oxirgi kuni. Eng ko‘p jabr chekayotgan yurt shubhasiz Italiya. Shu bois, Italiya futbolining ajoyib o‘yinlaridan birini eslashga ijozat bergaysiz.

"Yuventus" – "Milan". 2018 yilning 31 mart kuni "Alyans stedium"da o‘tkazilgan bahs Italiya futbolining bayroqdorlari o‘rtasidagi muhim o‘yin edi.

To‘g‘ri, 2018 yilgi "Milan" o‘zgarayotgan, hali qat’iy qay yo‘lga tushib olgani noma’lum, Gattuzoga ishonch bildirilgan, tarkibi yuz foizga o‘zgarib ketgan "Milan" edi. Undan birdaniga olamshumul muvaffaqiyatni, yo inqirozni kutish ham mumkin edi. Afsuski, asr avvalining oldi jamoasi inqiroz yo‘lini tanladi.

Ammo shunday bo‘lsa ham, "Yuventus"ga qarshi har bir o‘yinda "Milan" yuqori darajada o‘ynab beradi. Ko‘p e’tibor berganman. Ehtimol, birgina o‘yinga o‘tmishning nurli onlarini ko‘chirib o‘tishga harakat qilar. Yosh futbolchilar egnidagi libosni kimlar kiyganini eslab qolishar. Yo Gattuzo kabi klub afsonasib bo‘lgan yigitlar tushuntira olishar shu narsani.

Xullas, "Yuventus" shu kuni anchayin qiynalgan. Garchi hisobni Dibala superzarbasi bilan ochgan bo‘lsa-da, "Milan" tezda farqni yo‘qqa chiqargan. Gol muallifi – Bonuchchi. Ha, o‘sha Bonuchchi. "Yuventus"dan ba’zi sabablar tufayli "Milan"ga o‘tgan va sobiq jamoasiga qarshi bahsda o‘zini ko‘rsatgan Leonardo.

O‘yin tugashiga o‘n daqiqa qolgandagina "Yuventus" jismoniy tomondan ustunligini ko‘rsatdi va "Milan" himoyasining zaif tomonlaridan foydalana oldi. 79-daqiqa Xuan Kuadroda hisobni "Yuve" tomonga oshirgan bo‘lsa, Sami Xedira o‘yinga nuqta qo‘ydi. 3:1.

O‘yinga mos natija bo‘lmaganini aytib o‘taylik shu yerda. To‘p nazorati ellikka ellik, xavli zarbalar bo‘yicha "Milan" 10:7ga yenggan. O‘ntadan beshtasi darvoza sohasiga aniq yo‘llangan, "Yuventus"da to‘rttasi. To‘rttadan uchtasi gol. Bu albatta tajriba bilan bog‘liq masala.

"Milan" oxirigacha shunday o‘ynay olmadi va Gattuzoni bo‘shatib yubordi. Xato qildi. Bugungi "Napoli" ijrosidagi o‘yinlarda ko‘ryapmizki, unga ishonaverish kerak ekan.

Shuning uchun esladim. Afsus, bugun shu stadion va diyor futbolni hammadan ko‘proq sog‘inmoqda.

Xayrulla Hamidov.