Tokio Olimpiadasining 2021 yilga qoldirilishi bir qator sport turlarida ushbu yil uchun mo‘ljallangan jahon chempionatlarining o‘tkazilishiga ham ta’sir qilmoqda. Bu hol taekvondo sportini ham chetlab o‘tmadi.
Xitoyning Usi shahri 2021 yilning may oyida taekvondo bo‘yicha kattalar o‘rtasidagi navbatdagi dunyo birinchiligiga mezbonlik qilishi belgilangan edi. Biroq Olimpiadaning yoz fasliga mo‘ljallangani bu jahon chempionatining qoldirilishiga sabab bo‘lmoqda. Hozircha Butunjahon taekvondo federasiyasi Usidagi JCHni aynan qaysi muddatga ko‘chirishi bo‘yicha rasmiy xabar bergani yo‘q.
Eslatib o‘tamiz, ushbu sport turi bo‘yicha Tokio Olimpiadasining barcha yo‘llanmalari taqsimlab bo‘lingani yo‘q. Koronavirus inqirozi to‘liq bartaraf etilgach Osiyo va Yevropa qit’alari uchun kvalifikasion turnirlar o‘tkaziladi.
