Xalqaro futbol assosiasiyalari kengashi (IFAB) o‘yin qoidalariga ba’zi o‘zgarish va aniqliklar kiritilganini e’lon qildi.
Jumladan, yelkadan boshlab qo‘ltiq chegarasi chizig‘igacha bo‘lgan qismga to‘p tegsa, qoidabuzarlik hisoblanmaydi. Qo‘ltiq chegarasi chizig‘idan pastki qismi bilan to‘p o‘ynalsa, qoidabuzarlik hisoblanadi.
Shuningdek, hujum qilayotgan jamoa o‘yinchisining qo‘liga to‘p raqib jarima maydoni ichida tasodifan tegsa, hamisha ham qoidabuzarlik hisoblanmaydi. Endi to‘p faqatgina bevosita gol urilishi oldidan yoki golli vaziyat boshlanishi oldidan tasodifan qo‘lga tekkan holatdagina qoidabuzarlik hisoblanadi.
Shuningdek, VAR tizimi borasida ham aniqlik kiritildi: hakamning videoyordamchilari bosh hakamga qaror borasida maslahat berishi mumkin, ammo yakuniy qaror bosh hakam tomonidan chiqariladi.
Ofsayd qoidasiga tuzatish kiritildi. Endi himoyalanuvchi jamoa o‘yinchisi to‘pni ataylab qo‘l bilan o‘ynasa hamda to‘p ofsayd holatda turgan raqib o‘yinchisiga kelib tushsa, u ofsaydda hisoblanmaydi.
