Va-bank qanaqa bo‘ladi? O‘yinning oxirlarida himoyachi o‘rniga hujumchi tushirib, o‘yinni qutqarish yoki yirikroq hisobda mag‘lub bo‘lish mumkin. Mana shunaqa tavakkalchiliklar futbolda doim uchraydi. Biroq futbolimiz tarixida shunaqangi va-bank bo‘lganki...
1995 yilga murojaat qilamiz. Bir tomonda 1994 yilgi Osiyo o‘yinlarida g‘olib bo‘lgan jamoa, bir tomonda AQSH maydonlarida o‘tgan JCHda sensasiya o‘laroq tan olingan jamoa. Bu ikki jamoa to‘qnashuvidagi yulduzlar charog‘onligidan ko‘zlar qamashadi.
Bir tomonda Okocha, Ikpeba, Uest, Kanu, Amokachi, boshqa tomonda Qosimov, Shkvirin, Lebedev, Fyodorov, Abduraimov...
Milliy jamoamiz bosh murabbiyi Aleksandr Ivankov esa o‘yinning oxirgi dekadasini 5 (!) xujumchi bilan o‘tkazgan. Bunaqa va-bankni uncha-buncha futbol muxlisi ko‘rmagan bo‘lsa kerak.
Gapni muxtasar qilamiz. Bugun soat 22:00 da Afro-Osiyo kubogiga ixtiyor beramiz. Sport telekanali Sizlarni yana bir bor moziyga taklif qiladi. To‘lib-toshgan "Paxtakor" stadionida O‘zbekiston va Nigeriya milliy jamoalari!
Uyda qoling va bahra oling, azizlar!
Bobur Akmalov.
