Stadion.uz korona-tanaffus sababli transfermarket portalida keskin arzonlab ketgan futbolchilar bilan tanishtirib o‘tadi.
Kristian Erikson -32 million yevro
Qishda daniyalik futbolchi APLdan “A Seriya”ga ko‘chib o‘tgach, kutilganidek asosiy tarkib futbolchisiga aylana olmadi. Boz ustiga, futboldagi to‘xtalish sababli Eriksenda 4 yil deganda birinchi bor transfer qiymati tushib ketdi.
Filippe Koutinyo -34 million yevro
Braziliyalik futbolchi transfermarketdagi yangilangan narxlarga ko‘ra, 34 million yevroga arzonlab ketdi.
Endilikda uni qo‘lga kiritishni istagan klub 56 million yevro to‘lashiga to‘g‘ri keladi. Vaholanki, “Barselona” braziliyalik futbolchi uchun “Liverpul”ga 120 million yevro to‘lagan edi.
Bundan ko‘rinib turibdiki, Koutinyo “Barselona”ga o‘tgach, 60 millionga arzonlab ketdi.
Antuan Grizman -34 million yevro
Antuan yozda “Barselona” safiga kelib qo‘shilishi uchun Kataloniya klubi 120 million yevrodan voz kechishiga to‘g‘ri keldi.
Afsuski, amaldagi JCH g‘olibi deyarli bir mavsum davomida transfermarket portalining hisob-kitoblariga ko‘ra umumiy 50 million yevroga arzonladi.
Bunday pastlashga Grizmanning “Barselona”dagi nursiz o‘yinlari sabab bo‘lmoqda.
Lionel Messi -38 million yevro
Koronavirus sababli Leo ham transfermarketdagi o‘rnini bo‘shatib berishga majbur bo‘ldi. 6 bor “Oltin to‘p”ga loyiq ko‘rilgan futbolchi 38 million yevro “yo‘qotgach”, 7 ta futbolchini transfer narxi borasida o‘zidan oldinga o‘tkazib yubordi. Shunga qaramay, Messi 30 yoshdan oshgan futbolchilar ichida 100 milliondan yuqori baholangan yagona futbolchi bo‘lib turibdi.
Usman Dembele -44 million yevro
Bugungi ro‘yxatimizdagi “Barselona”ning 4-futbolchisi – Usman Dembelening holatiga havas qilib bo‘lmaydi.
Fransuz katta ehtimol bilan yozda Ispaniyani tark etadigan ko‘rinadi. Afsuski, kataloniyaliklar kamida 10 yil Usmanni klub tarixidagi eng omadsiz transfer sifatida esga olishlari mumkin.
Neymar -52 million yevro
Braziliyalik hujumchi korona-tanffus chog‘ida yangilangan narxlar e’lon qilingach, naqd 52 millionga arzonlagani ma’lum bo‘ldi.
Dunyoning eng qimmat futbolchisi maqomida PSJ klubi libosini kiygan futbolchi tinmay “Barselona”ga qaytish harakatida yuribti.
Endilikda Neymar uchun transfermarket portali bergan xabarlarga ko‘ra 128 million yevro to‘lash kifoya qiladi, biroq Parij klubi hujumchini bu summaga qo‘yib yubormasligi aniq.
Eden Azar -70 million yevro
Barchadan ko‘ra so‘nggi bir oy ichida Eden Azarda katta “yo‘qotish” kuzatildi. Qahramonimiz transfer qiymatining 70 millionini yo‘qotgach, ro‘yxatimizning birinchi pog‘onasiga loyiq ko‘rildi.
To‘g‘ri hozir ham belgiyalik futbolchini transfermarket 80 millionga (chakki narx emas) baholamoqda, biroq bu Azar uchun juda past ko‘rsatgich.
To‘xtab qolgan mavsum, jarohatlar va omadsiz debyut Azarning transfer qiymatiga katta ta’sir o‘tkazgan ko‘rinadi. Shunday bo‘lsada, Edenda barchasini o‘nglash va o‘z darjasiga qaytish uchun yetarlicha vaqt mavjud.
