Hujumchi Robin van Persi ko‘p vaqt mobaynida “Arsenal”ning eng yaxshi futbolchisi bo‘lib kelgan. 2012 yil niderlandiyalik hujumchi “Manchester Yunayted”ga ko‘chib o‘tgan. Van Persi birinchi mavsumidayoq APLda chempion bo‘lishga erishgan. Futbolchi nima uchun “MYU”ga o‘tganini tushuntirib o‘tdi.
“Farzandlarim haqqi qasam ichishim mumkin, “Arsenal” menga yangi shartnoma taklif qilmagan. Agar isbotlab berishsa, men million funt to‘layman. Biz muzokara o‘tkazganmiz, biroq yakunda qarashlarimiz har xilligini tushunib yetganmiz.
Men rahbariyatga o‘zimning takliflarimni aytdim. Ular ijrochi direktor Ivan Gazidisga ko‘rsatildi. Takliflarning hech biri ularni qoniqtirmadi. Men shunchaki, harakat qilishim kerakligini tushunib yetdim”, -deydi Van Persi.
