Ayni kunlarda respublikamizda koronavirus pandemiyasiga qarshi kurash doirasida ko‘plab xayrli ishlarga qo‘l urilmoqda. Muhtaram yurtboshimiz tashabbuslari bilan  “Sahovat va ko‘mak” umumxalq harakatini tashkil qilingani  esa, og‘ir kunlarda qiynalgan xalqimizga ko‘rsatilgan yuksak hurmat namunasi bo‘ldi. "Saxovat va ko‘mak" umumxalq harakati doirasida Qo‘qon shahrida ham minglab ijtimoiy muhofazaga muhtoj fuqarolarga oziq-ovqat mahsulotlari yetkazildi.

Albatta bunday kunlarda Qo‘qon xalqining sevimli jamoasi bo‘lgan “Qo‘qon-1912” futbol klubi ham qarab turmaydi. Kecha jamoamiz tomonidan "Saxovat va ko‘mak" umumxalq harakati doirasida 10 000 000 so‘m xayriya mablag‘lari ijtimoiy muhofazaga muhtoj oilalarga yordam uchun o‘tkazib berildi.

“Qo‘qon-1912” futbol klubi bundan bir necha kun muqaddam o‘zining muxlislari orasida kam ta’minlangan oila a’zolariga hamda Muqimiy mavzesida istiqomat qiladigan 10 nafar nogironligi bor oila a’zolariga 10 000 000 so‘m miqdorida xayriya qilgan edi. “Qo‘qon-1912” futbol klubi bu ishlar bilan chegaralanib qolmaydi. Biz pandemiyani to‘liq yengib o‘tgunimizcha va undan keyin ham muxlislarimiz bilan birga bo‘lamiz.

Yaratgandan barchangizga sog‘lik, sabr va matonat tilaymiz!