Xabaringiz bor, koronavirus pandemiyasi sababli dunyoning ko‘plab mamlakatlari qatori O‘zbekistonda ham futbol uchrashuvlari va mamlakat ichki chempionati to‘xtatilgan edi.

O‘zPFL yuzaga kelgan vaziyatni inobatga olgan holda milliy chempionat bahslarini davom ettirish bo‘yicha o‘z rejalarini ishlab chiqqani va buni Superliga klublari bosh murabbiylari bilan muhokama qilgani haqida oldinroq xabar bergan edik.

Bugun Respublika Maxsus Komissiyasi axboroti e’lon qilindi va Sog‘liqni saqlash vazirligi, AOKA, O‘zbekiston Yoshlar ittifoqi hamda Milliy mass-mediani qo‘llab-quvvatlash va rivojlantirish jamoat fondi hamkorligida tashkil qilingan Telegram kanalida professional futbol klublariga o‘z o‘quv mashg‘ulotlarini sanitariya qoidalari, normalari va gigiyena normativlariga muvofiq holda boshlashga ruxsat etilgani ma’lum qilindi.

Axborotda, shuningdek, futbol uchrashuvlarini 5 iyundan boshlab davom ettirish mumkinligi ko‘rsatib o‘tilgan.

O‘zPFL bunga qadar Superliga o‘yinlarini 5 iyundan boshlab tiklash rejalarini ishlab chiqqandi. Biroq bu rejaga rasman ruxsat etilishi uchun bir necha kun kerak bo‘ldi. Shundan va klublarning mashg‘ulotlarni to‘laqonli boshlab ulgurmagani, qolaversa chempionat restarti oldidan futbolchilar o‘z formalarini tiklashi uchun biroz vaqt kerak ekanligidan kelib chiqib, O‘zbekiston chempionati aynan qaysi sanadan start olishi bo‘yicha alohida ma’lumot beriladi.

Respublika Maxsus Komissiyasining mazkur qarori futbolimiz jamoatchiligi uchun juda quvonchli xabar bo‘ldi. Ayni vaqtda biz uchun eng muhimi – endilikda mashg‘ulotlarni rasman davom ettirish mumkin. Uzoq vaqt amaliyotsiz qolgan futbolchilar o‘z formasini tiklab olmasdan turib o‘yinlarga kirishsa, tabiiyki, jarohatlar ham avj oladi. Shu sababdan rasmiy uchrashuvlarning aynan qachondan davom ettirilishi borasida O‘zPFL alohida ma’lumot beradi.