Superliga 5-turi doirasidan o‘rin olgan bahsda “Navbahor” o‘z maydonida Buxoroning “Buxoro” jamoasini qabul qiladi.

Mazkur o‘yin oldidan “lochinlar”ning tajribali himoyachisi Mirzohid G‘ofurov uchrashuvdan oldin o‘z fikrlarini bildirib o‘tdi.

- Superliga bahslarining qayta boshlanganligi yaxshi bo‘ldi. Barcha futbolni sog‘ingandi.
Shu sababli, har bir o‘yin keskin kurashlar ostida kechmoqda.

Bunga restartdan keyingi uchrashuvlar natijasi ham yaqqol misol. Axir, o‘tgan turda “ Lokomotiv”ning o‘z maydonida “Metallurg”dan yirik hisobda (0:3) mag‘lubiyatga uchrashi, shuningdek,kechagi “Paxtakor” bilan bo‘lgan o‘yinda “Bunyodkor”ning o‘z darvozasidan 5ta to‘p o‘tkazib yuborishini kim ham o‘ylabdi, deysiz?

Jamoamiz esa o‘tgan turda Qarshidagi uchrashuvda ayrim kichik xatolar evaziga g‘alabani qo‘ldan boy berdi.

Shu bois, bugungi bahsda g‘alaba qozonib, muxlislarga quvonch ulashish niyatidamiz.
To‘g‘ri, hozirda butun dunyoda tarqalgan pandemiya sababli, ishqibozlarsiz to‘p tepishga majburmiz. Uyda ham, safarda ham ularning daldasini his qilib o‘ynaymiz. Qayerga bormaylik, jonkuyar muxlislarimiz doim biz bilan birga bo‘lishardi. O‘ylaymanki, teleekran ortida sanoqsiz muxlislar bizni olqishlab turishadi.

“Navbahor”ning maqsadi chempion bo‘lish. Keyingi mavsumda OCHLda o‘ynashni xohlaymiz. “Navbahor” o‘z oldiga yuqori maqsadlarni qo‘yadigan jamoa.

“Navbahor” PFK matbuot xizmati.