Суперлига 5-тури доирасидан ўрин олган баҳсда “Навбаҳор” ўз майдонида Бухоронинг “Бухоро” жамоасини қабул қилади.

Мазкур ўйин олдидан “лочинлар”нинг тажрибали ҳимоячиси Мирзоҳид Ғофуров учрашувдан олдин ўз фикрларини билдириб ўтди.

- Суперлига баҳсларининг қайта бошланганлиги яхши бўлди. Барча футболни соғинганди.
Шу сабабли, ҳар бир ўйин кескин курашлар остида кечмоқда.

Бунга рестартдан кейинги учрашувлар натижаси ҳам яққол мисол. Ахир, ўтган турда “ Локомотив”нинг ўз майдонида “Металлург”дан йирик ҳисобда (0:3) мағлубиятга учраши, шунингдек,кечаги “Пахтакор” билан бўлган ўйинда “Бунёдкор”нинг ўз дарвозасидан 5та тўп ўтказиб юборишини ким ҳам ўйлабди, дейсиз?

Жамоамиз эса ўтган турда Қаршидаги учрашувда айрим кичик хатолар эвазига ғалабани қўлдан бой берди.

Шу боис, бугунги баҳсда ғалаба қозониб, мухлисларга қувонч улашиш ниятидамиз.
Тўғри, ҳозирда бутун дунёда тарқалган пандемия сабабли, ишқибозларсиз тўп тепишга мажбурмиз. Уйда ҳам, сафарда ҳам уларнинг далдасини ҳис қилиб ўйнаймиз. Қаерга бормайлик, жонкуяр мухлисларимиз доим биз билан бирга бўлишарди. Ўйлайманки, телеэкран ортида саноқсиз мухлислар бизни олқишлаб туришади.

“Навбаҳор”нинг мақсади чемпион бўлиш. Кейинги мавсумда ОЧЛда ўйнашни хоҳлаймиз. “Навбаҳор” ўз олдига юқори мақсадларни қўядиган жамоа.

“Навбаҳор” ПФК матбуот хизмати.