Belarus chempionatining ikkinchi davrasiga start berildi. "Energetik-BGU" klubi 16-tur doirasida BATE klubi mehmoni bo‘lib, muhim g‘alabani qo‘lga kiritdi. O‘zbekistonlik yarim himoyachi Shahboz Umarov asosiy tarkibga kiritilgan bo‘lsa, Jasur Yaxshiboyev bugungi o‘yin qaydnomasiga kiritilmadi.

Bahsning 20-daqiqasida "talabalar" himoyachisi Svirepa ikkinchi sariq kartochkani olib, maydonni tark etdi. Ammo oradan 3 daqiqa o‘tib BATE darvozasi tomon 30-35 metrlar masofadan jarima zarbasi belgilandi. Shahboz Umarov esa Roberto Karlos uslubida to‘g‘ridan-to‘g‘ri darvoza tomon zarba berdi. To‘p naq "to‘qqizlik"ka yaqin joydan to‘rga borib tushdi.

"Energetik" o‘yin oxiriga qadar ishonchli himoyalandi va g‘alabani ushlab qoldi. Umarov esa 59-daqiqada zaxiraga olindi.

Shu tariqa, "Energetik" birinchi davrada Yaxshiboyevning "dubli" evaziga BATEni mag‘lub etgan bo‘lsa, bu safar Umarovning goli talabalarga g‘alaba keltirdi. Ushbu g‘alabadan keyin "talabalar" 29 ochko bilan jadvalda 2-o‘ringa ko‘tarilib oldi. Endi jamoa BATEdan 1 ochko ortda qolmoqda.

Belarus chempionati, 16-tur
BATE – Energetik-BGU 0:1 (0:1, 0:0)
Gol: 0:1 – 23 Shahboz Umarov.
BATE – Chichkan, Filipenko, Filipovich (Skavish, 78), Nastich, Filipovich, Baga (Mukam, 78), Dragun, Nexaychik, Stasevich, Milich, Yablonskiy.
Energetik-BGU – Sadovskiy, Mavatu, Yudchis, Miroshnikov, Svirepa, Tve (Sovpel, 58), Nosko, Girs, Shahboz Umarov (Dias, 59), Shkurdyuk, Atemeng (Musaxanyan, 26).
Ogohlantirishlar: Svirepa (7), Tve (28), Nastich (39).
Chetlatish: Svirepa (20).