Беларусь чемпионатининг иккинчи даврасига старт берилди. "Энергетик-БГУ" клуби 16-тур доирасида БАТЭ клуби меҳмони бўлиб, муҳим ғалабани қўлга киритди. Ўзбекистонлик ярим ҳимоячи Шаҳбоз Умаров асосий таркибга киритилган бўлса, Жасур Яхшибоев бугунги ўйин қайдномасига киритилмади.

Баҳснинг 20-дақиқасида "талабалар" ҳимоячиси Свирепа иккинчи сариқ карточкани олиб, майдонни тарк этди. Аммо орадан 3 дақиқа ўтиб БАТЭ дарвозаси томон 30-35 метрлар масофадан жарима зарбаси белгиланди. Шаҳбоз Умаров эса Роберто Карлос услубида тўғридан-тўғри дарвоза томон зарба берди. Тўп нақ "тўққизлик"ка яқин жойдан тўрга бориб тушди.

"Энергетик" ўйин охирига қадар ишончли ҳимояланди ва ғалабани ушлаб қолди. Умаров эса 59-дақиқада захирага олинди.

Шу тариқа, "Энергетик" биринчи даврада Яхшибоевнинг "дубли" эвазига БАТЭни мағлуб этган бўлса, бу сафар Умаровнинг голи талабаларга ғалаба келтирди. Ушбу ғалабадан кейин "талабалар" 29 очко билан жадвалда 2-ўринга кўтарилиб олди. Энди жамоа БАТЭдан 1 очко ортда қолмоқда.

Беларусь чемпионати, 16-тур
БАТЭ – Энергетик-БГУ 0:1 (0:1, 0:0)
Гол: 0:1 – 23 Шаҳбоз Умаров.
БАТЭ – Чичкан, Филипенко, Филипович (Скавиш, 78), Настич, Филипович, Бага (Мукам, 78), Драгун, Нехайчик, Стасевич, Милич, Яблонский.
Энергетик-БГУ – Садовский, Мавату, Юдчиц, Мирошников, Свирепа, Тве (Совпель, 58), Носко, Гирс, Шаҳбоз Умаров (Диас, 59), Шкурдюк, Атеменг (Мусаханян, 26).
Огоҳлантиришлар: Свирепа (7), Тве (28), Настич (39).
Четлатиш: Свирепа (20).