Sosa Sola Superligasi 11-tur doirasidagi "Lokomotiv" - "Qo‘qon-1912" uchrashuvdan keyingi matbuot anjumanining birinchi qismida jamoamiz ustozi Baxtiyor Ashurmatov ishtirok etdi.

"Bugungi bahs asabiy tarzda o‘tdi. O‘yin oxirigacha jangovor ruhda o‘tdi. Murabbiylar shtabi ham so‘nggi daqiqaga qadar hayajonda o‘tirdik. Mehmondagi birinchi g‘alabani qo‘lga kiritganimizdan xursandman. Ushbu g‘alaba bilan jamoamiz rahbarlari va muxlislarimizni tabriklayman. Hisob ochilguncha qadar bir qator vaziyatlardan foydalana olmadik. Raqib esa bundan foydalandi. Abduholiqov yuqori saviyadagi hujumchi ekanligini isbotladi. Yigitlarga ham rahmat aytaman. Ular oxirgacha kurashishdi va g‘alaba qozonishdi. Biz bugun juda muhim bo‘lgan g‘alabani qo‘lga kiritdik.

Ko‘pchilik aytayotganidek biz 7-o‘rinni olib Osiyo Chempionlar ligasida o‘ynashni xohlamaymiz. Biz OCHL chiptasini o‘zimizning mehnatimiz bilan qo‘lga kiritmoqchimiz. Halol yo‘l bilan Osiyo Chempionlar ligasiga yo‘llanma olib rahbariyat va muxlislarimiz orzularini ro‘yobga chiqarmoqchimiz.

Yozgi transferlar paytida  o‘ng qanot yarim himoyani kuchaytirishni istagandik. Ammo o‘zimiz istagan futbolchilarni, ya’ni  Javohir Sidiqov hamda Asad Sobirjonovni ololmadik. "Paxtakor" Ochlda o‘ynashini hisobga olib bu futbolchilarni  qo‘yvorishni istamadi. Bizning jamoamiz uchun o‘ynash istagida bo‘lgan o‘yinchilarning shartnomasi bor. O‘zimizning yigitlar bilan vaziyatdan chiqishga qaror qildik. Lekin transfer oynasi yakuniga qadar bitta futbolchi olishimiz mumkin.

“Lokomotiv” jamoasining yangi murabbiyi Dilshod Nuraliyevga omad tilayman.

Murod Xolmuhammedovning hozirgi holati 90-daqiqa o‘ynashga yetmaydi. Biz uchun futbolchilarimizning sog‘ligi birinchi o‘rinda turadi. Murod jarohatini davolash uchun ko‘p vaqtni o‘tkazdi. Agar keyingi o‘yinga qadar u to‘liq tiklansa, uni maydonga tushiramiz va  penalti belgilansa bugungidek hayajonlanmay o‘tiramiz", — dedi Ashurmatov.