Rossiya chempioni va O‘zbekiston terma jamoasi safida 64 ta o‘yin o‘tkazgan Andrey Fyodorov 2026 yilgi jahon chempionatida ishtirok etayotgan O‘zbekiston milliy jamoasining imkoniyatlari haqida fikr bildirdi.

Fyodorovning ta’kidlashicha, mamlakatda futbolga bo‘lgan qiziqish misli ko‘rilmagan darajaga chiqqan.

«Men terma jamoadagi yigitlar bilan gaplashdim. Ular aytishicha, mamlakatda ish kunining boshlanish vaqti ham ko‘chirilgan, odamlar futbolni tomosha qilib, keyin bemalol ishga borishlari uchun sharoit yaratilgan. Hozir O‘zbekistonda qanday muhit hukm surayotganini tasavvur qilish mumkin», — dedi u.

Sobiq futbolchi O‘zbekiston futbolining taraqqiyoti bir necha yillik tizimli ish natijasi ekanini ta’kidladi.

«Infratuzilma yaxshilandi, yoshlarga munosabat o‘zgardi, kuchli terma jamoalar bilan o‘rtoqlik uchrashuvlari tashkil qilindi. Bularning barchasi bugungi natijalarning asosidir», — deya qayd etdi Fyodorov.

U Fabio Kannavaroning terma jamoadagi roliga ham yuqori baho berdi.

«Kannavaro futbolchilarga bosimni yengishni o‘rgatmoqda. U doim takrorlaydi: "Hech kimdan qo‘rqmang". Bu juda muhim. Jamoa har qanday raqibga qarshi o‘ziga ishonch bilan o‘ynashi kerak», — dedi sobiq himoyachi.

Fyodorov Kolumbiyaga qarshi 1:3 hisobidagi mag‘lubiyatga qaramay, O‘zbekistonning o‘yini yaxshi taassurot qoldirganini ta’kidladi.

«Hisob aldamchi bo‘lmasligi kerak. Birinchi 15-20 daqiqadagi hayajondan keyin O‘zbekiston zamonaviy va sifatli futbol namoyish qildi. Jamoaviy harakatlar juda yaxshi ko‘rindi», — dedi u.

Portugaliyaga qarshi uchrashuv oldidan esa u futbolchilarga muhim maslahat berdi:

«Men ularga bitta narsani aytardim: sabr qilish kerak. Sabr qilish va yana sabr qilish. Bosh murabbiy tanlagan rejaga qat’iy amal qilish lozim».

Fyodorovning fikricha, O‘zbekiston pley-offga chiqish uchun yetarli imkoniyatga ega.

«Bu real vazifa. Albatta, Portugaliyaning Kabo-Verde bilan durang o‘ynagani vaziyatni biroz murakkablashtirdi. Endi natija birinchi o‘ringa chiqadi. Ammo Kolumbiyaga qarshi o‘yinni ko‘rib, jamoaning imkoniyati borligiga ishondim», — dedi u.

Sobiq futbolchi turnirning asosiy sensasiyasi sifatida Kabo-Verde terma jamoasini ko‘rsatdi.

«Ular haqiqiy jamoa ekanini isbotlashmoqda. Ispaniyadan ochko olishdi, keyin Urugvay bilan ham durang o‘ynashdi. Hech kimga ularga qarshi oson bo‘lmaydi», — deya xulosa qildi Andrey Fyodorov.