«Sevilya» Yevropa Ligasi finalida «Inter»ni mag‘lub etib (3:2), musobaqa g‘olibiga aylandi.

Shu tariqa ispan klublari 2002 yildan beri Yevrokuboklarning barcha 15 ta finalida boshqa davlat klublarini mag‘lub etishning uddasidan chiqdi.

Bu davr ichida «Real» uch marta, «Barselona» esa to‘rt marta Chempionlar Ligasida g‘olib bo‘lgan.

2004 yilda «Valensiya» UYEFA Kubogini qo‘lga kiritgan bo‘lsa, «Sevilya» 5 bor UYEFA Kubogi/Evropa Ligasida g‘olib chiqqan. «Atletiko» esa ikki marta musobaqa (Evropa Ligasi) bosh sovriniga ega chiqqan.

Qayd etish joiz, La Liga jamoalari so‘nggi marta 2001 yilda Yevrokuboklar finalida boshqa mamlakat jamoalariga mag‘lub bo‘lgan. O‘shanda «Alaves» UYEFA Kubogi finalida «Liverpul»ga, «Valensiya» esa Chempionlar Ligasi finalida «Bavariya»ga yutqazib qo‘ygandi.