VAR tizimini O‘zbekistonda joriy etish va o‘zbekistonlik mutaxassilarga ushbu tizimni o‘qitish bo‘yicha FIFA dasturlaridan keng foydalanilmoqda.

Hususan, kecha Futbol mutaxassislarini tayyorlash markazida (Video Assistant Referee) video yordamchi hakamlar tayyorlash bo‘yicha navbatdagi nazariy-amaliy seminar bo‘lib o‘tmoqda. Mazkur seminar VAR tizimi bilan ishlaydigan hakamlar tajribalarini oshirishga xizmat qiladi.

FIFA 2020 VAR simulyatoridan foydalangan holda seminar qatnashchilari mashg‘ulotlar davomida dolzarb mavzularda, hususan to‘pni qo‘l bilan o‘ynash, jarima maydonchasidagi qoida buzishlar, ofsayd, taktik qoida buzarliklar bo‘yicha o‘z malakalarini oshirmoqda.

Bundan tashqari, VAR qaysi holatda hakamlik jarayoniga bevosita ta’sirini o‘tkaza olishi, bosh hakamga takroriy vaziyatni tomosha qilishni maslahat berishi yoki noto‘g‘ri qilingan qaror bo‘yicha xabardor etishi bo‘yicha tavsiyalar berilmoqda.

Har bir hakam VAR simulyatoridagi mashg‘uloti uchun muayyan bir vaqt ajratilmoqda va ushbu vaqt davomida uning ko‘rsatgan natijalari hisoboti FIFAga yuboriladi.

Hakamlarimiz VAR ko‘nikmalarini to‘liq o‘zlashtirishlari uchun yana bir qancha nazariy va amaliy mashg‘ulotlar tashkil etilishi rejalashtirilgan. Seminarni FIFA instruktori - Farhod Abdullayev olib bormoqda.