Coca-Cola Superliganing 13-turidan o‘rin olgan «Lokomotiv» — «Nasaf» uchrashuvidan keyin qarshiliklar bosh murabbiyi Ro‘ziqul Berdiyev bellashuv haqida o‘z fikrlarini bildirdi.

«Himoyada bexato o‘ynashga harakat qildik. Himoyachilarimiz buni uddalashdi. Hujumdagi vaziyatlarning juda kamidan foydalandik. Yaratilgan vaziyatlarning ko‘pidan foydalana olmadik. »Lokomotiv” jamoasi himoyada ko‘p xatolar qildi. Biz bundan unumli foydalanishga harakat qildik. Biz ularni o‘rganib chiqqanimizda himoyada muammo borligini bilardik. Futbolchilarga ham katta rahmat aytaman, ko‘rsatmalarimni bajarishdi. 90 daqiqa davomida diqqat va e’tiborni yo‘qotmasdan harakat qilishdi.”,— deydi Ro‘ziqul Berdiyev.

— Birinchi davra o‘z nihoyasiga yetdi, transfer oynasi ham ochiq. Jamoada qandaydir o‘zgarishlar ro‘y beradimi?
— Yana bir hujumchi olsak yaxshi bo‘lardi, buni rahbariyat bilan gaplashamiz. Qanot pozisiyasida muammolarimiz bor.

— O‘zbek bozorida ko‘z ostingizga olib qo‘ygan hujumchi bormi?
— O‘zbek bozorida hujumchilar kamayib bormoqda, aynan ko‘zlagan futbolchimiz yo‘q lekin tajribali hujumchi bo‘lsa ko‘rib chiqamiz.

— Ushbu bellashuvni «Lokomotiv» jamoasini eng oson yutgan bellashuvingiz desa bo‘ladimi?
— «Lokomotiv»ni hozirgi tarkibi ham tajribali. Yigitlarga avvalgi natijalarni esdan chiqarib to‘p tepishlarini ta’kidlagandim.

— Oxirgi to‘rtta turda biz o‘zbekcha “boxing day” ga guvoh bo‘ldik, nima deb o‘ylaysiz bizning futbolchilar bunga tayyormi?
— Klublar va futbolchilar har uch kunda o‘ynashga tayyor emas. Oxirgi ikki turda temp juda pas bo‘ldi. Bunga o‘rganishimiz kerak. Biz to‘rtta uchrashuv o‘tkazdik. Biz bu uchrashuvlardan maksimal darajada ochko ishlashimiz kerak edi. «Bunyodkor» bilan durang o‘ynaganimiz biz uchun alamli bo‘ldi.

— Endi jamoa Qarshiga ketadimi?
— Futbolchilarimiz turli terma jamoalarga taklif etildi. Hozir Qarshiga boramiz va futbolchilarga uch kun dam olish imkonini beramiz. keyin o‘z qarorgohimizda ikkinchi davraga tayyorgarlik ko‘rishni boshlaymiz.