Yengil vazn toifasida UFC chempioni Habib Nurmagomedov Jastin Getjiga qarshi jang oldidan o‘z fikrlari bilan o‘rtoqlashdi.

"24 oktyabr kuni raqibimni nokaut qilishga harakat qilaman. Ikkinchi yoki uchinchi raundda jangni tugatmoqchiman. Getjining parterda nima qila olishga qiziqyapman. Uni hech kim bilan parterda ko‘rmaganmiz. Chidamlilik nuqtai nazaridan men o‘zimni undan ikki bosh baland deb hisoblayman. Ammo zarba berishda... Ko‘pchilik mening zarbalarimga shubha qiladi. 12 yildan beri professional janglar o‘tkazaman. Va bu vaqt ichida menda hatto oddiy shilinish va shunga o‘xshash narsalar bo‘lmagan. Jastin Getji esa ikki marta nokautga uchragan. Unga katta zarar yetkazilgan. U kuchli va chidamli jangchi. Ammo ich ichimdan zarba berish texnikasida ham undan bir bosh baland ekanimga ishonaman", — dedi Habib Nurmagomedov.

Eslatib o‘tamiz, Habib va Getji o‘rtasidagi jang 24 oktyabr kuni Abu-Dabidagi «Jangchilar oroli»da bo‘lib o‘tadi.

Habib oxirgi jangini 2019 yilning sentyabr oyida o‘tkazgan. O‘shanda u Dastin Poryeni muddatidan oldin mag‘lub etgandi. Umumiy hisobda Habib MMA’da 28 ta jang o‘tkazib, 28 g‘alabaga erishgan. 2020 yilning may oyida Toni Fergyusonni mag‘lub etgan Jastin Getjining hisobida esa 22 g‘alaba va 2 mag‘lubiyat bor.