Bugun Pro-Liga vakili “Oqtepa” mashg‘ulot bazasida jamoaning yangi a’zolarini ommaga rasman tanishtirdi. Xususan, Ispaniyadan jalb qilingan yangi murabbiy Serxio Mariangelli matbuot anjumanida O‘zbekistonga tashrifi va yangi jamoa bilan oldindagi rejalar haqida gapirib o‘tdi:
“Ushbu klubdan takliflar bo‘lgach, bu haqida yaxshilab o‘rganib chiqdim. Mening oldimdagi birinchi masala - oilamdan uzoqda, o‘zim hech qanday ma’lumotga ega bo‘lmagan davlatda yashash edi. Ammo rahbariyat bilan gaplashganimda ularning fikri bilan mening qarashlarimda mutanosiblik borligini sezdim. Oilamni Ispaniyada qoldirib kelgan bo‘lsam-da, bu yerda yana bir oila tarkibiga qo‘shildim.
Futbolni chindildan yaxshi ko‘raman. O‘zbekistondan bildirilgan taklifga rozi bo‘lganimning asosiy sababi - bu yerda professional murabbiy va inson sifatida o‘sishga erisha olaman. Kelishimdan maqsad pul emas.
Muzokaralar o‘tkazilayotgan paytda klubning bir nechta uchrashuvlari videolavhalarini ko‘rdim. Ochig‘i, ularning bu darajada yaxshi o‘ynashini kutmagandim. Ushbu uslubni o‘zgartirishning hech ham hojati yo‘q. Kichik zonalarda tezkor harakatlarni amalga oshirish orqali jamoaviy futbolni rivojlantirishga harakat qilamiz”, - dedi murabbiy.
