Бугун Про-Лига вакили “Оқтепа”  машғулот базасида жамоанинг янги аъзоларини оммага расман таништирди. Хусусан, Испаниядан жалб қилинган янги мураббий Серхио Мариангелли матбуот анжуманида Ўзбекистонга ташрифи ва янги жамоа билан олдиндаги режалар ҳақида гапириб ўтди:

“Ушбу клубдан таклифлар бўлгач, бу ҳақида яхшилаб ўрганиб чиқдим. Менинг олдимдаги биринчи масала - оиламдан узоқда, ўзим ҳеч қандай маълумотга эга бўлмаган давлатда яшаш эди. Аммо раҳбарият билан гаплашганимда уларнинг фикри билан менинг қарашларимда мутаносиблик борлигини сездим. Оиламни Испанияда қолдириб келган бўлсам-да, бу ерда яна бир оила таркибига қўшилдим.

Футболни чиндилдан яхши кўраман. Ўзбекистондан билдирилган таклифга рози бўлганимнинг асосий сабаби - бу ерда профессионал мураббий ва инсон сифатида ўсишга эриша оламан. Келишимдан мақсад пул эмас.

Музокаралар ўтказилаётган пайтда клубнинг бир нечта учрашувлари видеолавҳаларини кўрдим. Очиғи, уларнинг бу даражада яхши ўйнашини кутмагандим. Ушбу услубни ўзгартиришнинг ҳеч ҳам ҳожати йўқ. Кичик зоналарда тезкор ҳаракатларни амалга ошириш орқали жамоавий футболни ривожлантиришга ҳаракат қиламиз”, - деди мураббий.