Italiyalik taniqli mutaxassis Fabio Kapello Turinning «Yuventus» jamoasining transfer siyosati va Andrea Pirloning murabbiylik faoliyati haqida fikr bildirdi.
"Ayni damda, «Yuve»ning qanday natija ko‘rsatishi barchada qiziqish uyg‘otmoqda. Bu haqiqat. Yangi o‘yin uslubi, yangi nomlar va yangicha yondashuv. Anchadan beri Turin klubi bu qadar katta tavakkalga qo‘l urmagan edi.
Morataning transferi biroz tushunarsiz. Gap shundaki, «zebralar» «Roma» forvardi Edik Jeko bilan shartnoma imzolamoqchi edi. Negadir, bu transfer amalga oshmadi. Iguaindan bo‘shab qolgan o‘rinni to‘ldirish lozim edi. Klub majburlikdan Morata bilan shartnoma imzoladi. Aslida, «Yuve» umuman boshqacha uslubdagi hujumchi izlagan edi.
To‘g‘ri, Morata sifatli transfer. Texnikasi ajoyib bo‘lgan sportchining jismoniy imkoniyatlariga qoyil qolish mumkin, ammo u klassik markaziy hujumchi emas. Men doimo aql bilan to‘p suruvchi futbolchilar bilan hamkorlik qilishni Afzal ko‘rganman. Morata ana shunday futbolchilar sirasiga kiradi, biroq «Yuventus» uchun o‘zgacharoq uslubda harakat qiluvchi hujumchi kerak edi.
Andrea Pirloning qanday murabbiy ekanligi haqida biror narsa deya olmayman. U men ko‘rgan eng kuchli futbolchilardan biri. Undan qanday murabbiy chiqishini ko‘rgim kelyapti. Balki, unga o‘z rejalarini amalga oshirish uchun ijrochilar yetishmas, biroq men bugungi kundagi «Yuventus»ning tarkibidan nolimagan bo‘lar edim."
